ლონდონში მომხდარი ტერაქტის შედეგად საქართველოს მოქალაქეები არ დაშავებულან

საქართველოს საგარეო საქმეთა სამინისტროს ინფორმაციით, ლონდონში მომხდარი ტერაქტის შედეგად საქართველოს მოქალაქეები არ დაშავებულან. საგარეო საქმეთა სამინისტრო ლონდონში მომხდარ ტერორისტულ აქტთან დაკავშირებით საქართველოს მოქალაქეების საყურადღებოდ ცხელი ხაზის ნომერსაც აქვეყნებს.

”ლონდონში მომხდარ ინციდენტთან დაკავშირებით დიდი ბრიტანეთისა და ჩრდილოეთ ირლანდიის გაერთიანებულ სამეფოში საქართველოს საელჩოში მოქმედებს ცხელი ხაზი: +44 7872 064830. ასევე 24 საათიანი ცხელი ხაზი მოქმედებს საგარეო საქმეთა სამინისტროს საკონსულო დეპარტამენტში: (+995 32) 294 50 50. ამ ეტაპზე ბრიტანული მხარე დაღუპულთა და დაშავებულთა შორის საქართველოს მოქალაქეების არსებობას არ ადასტურებს. ქალაქის პოლიცია მოსახლეობას მოუწოდებს, თავი შეიკავონ შემდეგ ტერიტორიებზე გადაადგილებისაგან: London Bridge, Borough Market”-ნათქვამია საგარეო საქმეთა სამინისტროს განცხადებაში.

ლონდონის პოლიციის ცნობით, ტერაქტის შედეგად 6 ადამიანი დაიღუპა. ამის შესახებ სკოტლენდ-იარდის წარმომადგენელმა მარკ როულიმ განაცხადა. მისივე თქმით, დაშავებულია 20 ადამიანი. პოლიციის წარმომადგენელმა განაცხადა, რომ 3 თავდამსხმელი ლიკვიდირებულია.