დედაქალაქის მერია გარემოვაჭრეების პროტესტს პასუხობს

თბილისის მერის მოადგილე ირაკლი ლექვინაძე გარემოვაჭრეების პროტესტს პასუხობს. მისი განცხადებით, გამონაკლისი ვერ იქნება ვერც ერთ შემთხვევაში, რომელიმე კონკრეტული ჯგუფისთვის და თბილისის მერია გააგრძელებს გარევაჭრობის დარეგულირებას.

"თბილისის მერია აგრძელებს მიზანმიმართულ და თანმიმდევრულ მოქმედებებს გარევაჭრობის დარეგულირებისკენ. ამ დროისთვის ჩვენ დაგვრჩა ორი ლოკაცია: სამგორისა და ვარკეთილის მეტროების მიმდებარე ტერიტორიები. დაახლოებით, ორი კვირის ვადაში აღნიშნულ ტერიტორიებზეც დარეგულირდება გარევაჭრობა. ჩვენ ძალიან კარგად გვესმის ამ საკითხის სოციალური სიმძიმე. თუმცა, კიდევ ერთხელ ვიმეორებ, მიმდინარეობს წინასწარი გაფრთხილება, არ ხდება ქონების და საქონლის ჩამორთმევა და კონფისკაცია, თითოეულ მათგანზე შეთავაზებულია ალტერნატიული ადგილები", - განმარტავს ირაკლი ლექვინაძე.

ამასთან, ლექვინაძე დასძენს, რომ ამ დროისთვის მერიის მიერ ვაჭრობისთვის გამოყოფილი ადგილები საკმარისია.

თბილისის მერიასთან ნავთლუღის ბაზრობების გარემოვაჭრეები აქციას მართავენ. მათი დახლები მერიას ჯერ არ აუღია, ისინი გარევაჭრობის უფლების 6 თვით გაგრძელებას ითხოვენ. მოთხოვნების დაუკმაყოფილებლობის შემთხვევაში კარვების გაშლით და შიმშილობით იმუქრებიან.

თბილისის მერიამ გარევაჭრობის წინააღმდეგ ზომების მიღება 19 მარტიდან დაიწყო. ბოლო რამდენიმე დღის განმავლობაში გარევაჭრობა აიკრძალა ბარათაშვილის ქუჩასა და კოლმეურნეობის მოედანზე, მარჯანიშვილის მეტროსთან, მეტრო ახმეტელთან, სადგურის, დინამოსა  და გადასასვლელი ხიდის მიმდებარე ტერიტორიაზე, რასაც გარემოვაჭრეთა პროტესტი მოჰყვა. ისინი აცხადებენ, რომ ბაზრის შიდა ტერიტორიაზე ვაჭრობა არ უნდათ, რადგან სალარო აპარატის გამოყენება მოუწევთ და ამ შემთხვევაში მათ მოგება არ დარჩებათ. თბილისის მერია კი ამბობს, რომ გარემოვაჭრეებს უკანონო საქმიანობის უფლებას აღარ მისცემს.

ჯამურად ზემოთჩამოთვლილ გაწმენდილ ტერიტორიებზე 750-დან 800 ადამიანამდე ვაჭრობდა.