106 წლის ასაკში გებელსის მდივანი გარდაიცვალა

მიუნხენში 106 წლის ასაკში გერმანიის სახალხო განათლებისა და პროპაგანდის მინიტრის იოზეფ გებელსის მდივანი ბრუნგილდა პომზელი გარდაიცვალა.

2016 წლის აგვისტოში პომზელმა პირველად ისაუბრა გებელსთან მუშაობის შესახებ. მისი თქმით, ის ჰიტლერის ბუნკერში ალკოჰოლის მარაგს აკონტროლებდა. მის ამოცანაში ასევე შედიოდა დაღუპული ჯარისკაცებისა და საბჭოთა სამხედროების მიერ გაუპატიურებული გერმანელი ქალების სტატისტიკა.

ბრუნგილდა პომზელი 1911 წლის 11 იანვარს ბერლინში დაიბადა. გებელსთან მუშაობა მან 1942 წელს დაიწყო და მის მდივნად სამი წლის განმავლობაში მუშაობდა. 1945 წლის 1 მაისს მინისტრმა და მისმა ცოლმა თავიანთი ექვსივე შვილი მოწამლეს და შემდეგ თავი მოიკლეს. მალე პომზელიც დააპატიმრეს და ხუთი წლით პატიმრობა მიუსაჯეს.

გათავისუფლების შემდეგ პომზელი 20 წლის განმავლობაში ტელეარხ ARD-ში მუშაობდა. მისი თქმით, მხოლოდ სასჯელის მოხდის შემდეგ შეიტყო ჰოლოკოსტისა და ებრაელების მიმართ ჰიტლერის პოლიტიკის შესახებ.