დონალდ ტრამპის ინაუგურაციაზე საქართველოს დავით ბაქრაძე წარმოადგენს

აშშ-ის პრეზიდენტის ინაუგურაციის ოფიციალურ ღონისძიებებზე ქვეყანას აშშ-ში საქართველოს ელჩი დავით ბაქრაძე წარმოადგენს. 
დღეს, ქალაქ ვაშინგტონში ამერიკის შეერთებული შტატების პრეზიდენტის 58-ე ინაუგურაციის ცერემონიალი გაიმართება, რომელიც ოფიციალურ ღონისძიებებსა და მიღებებს ითვალისწინებს. 
საქართველოს საგარეო საქმეთა სამინისტროს ინფორმაციით, აშშ-ის 45-ე პრეზიდენტის, დონალდ ტრამპის ინაუგურაციაზე სახელმწიფოები დიპლომატიური მისიების ხელმძღვანელების დონეზე წარდგებიან. ღონისძიებაზე საქართველოს წარადგენს ელჩი დავით ბაქრაძე, რომელიც მონაწილეობას მიიღებს ცერემონიალის განრიგით გათვალისწინებულ ყველა ოფიციალურ ღონისძიებაში. 
საქართველოს ელჩი, აშშ-ში აკრედიტირებულ სხვა ელჩებთან ერთად, დაესწრება 45-ე პრეზიდენტის ფიცის დადების ცერემონიალს კაპიტოლიუმის დარბაზში. 
სადღესასწაულო ღონისძიება გაგრძელდება თეთრი სახლის წინ გამართული საინაუგურაციო აღლუმით, რომელსაც დიპლომატიური კორპუსის წარმომადგენლები სპეციალურად მათთვის განკუთვნილი პოდიუმიდან დააკვირდებიან. 
დღის ბოლოს, საქართველოს ელჩი ასევე ეწვევა ოფიციალურ საინაუგურაციო მიღებას. 
საგარეო საქმეთა სამინისტროს ინფორმაციით, საინაუგურაციო ღონისძიებების ფარგლებში, საქართველოს ელჩი უკვე დაესწრო საინაუგურაციო კომიტეტის ვახშამს და სადღესასწაულო კონცერტს, სადაც მონაწილეობა მიიღეს არჩეულმა პრეზიდენტმა, ვიცე-პრეზიდენტმა და სხვა ოფიციალურმა პირებმა.
საქართველოს ელჩი 21 იანვარს ასევე დაესწრება ვაშინგტონის ეროვნულ საკათედრო ტაძარში გამართულ სპეციალურ წირვას.