აშშ-ის მომავალი სახელმწიფო მდივანი: რუსეთი ნატოს ქვეყნებისთვის საფრთხეს წარმოადგენს

აშშ-ის სახელმწიფო მდივნობის კანდიდატი რექს თილერსონი მიიჩნევს, რომ რუსეთი საფრთხეს წარმოადგენს და აშშ-ს მოკავშირეები და ნატოს ქვეყნები მართალნი არიან, როდესაც შეშფოთებას გამოთქვამენ  ამის გამო.

The Washington Post-ის ცნობით, ასეთ შინაარს შეიცავს თილერსონის სიტყვა, რომლითაც ის სენატის კომიტეტის მოსმენაზე უნდა წარსდგეს.

The Washington Post-ის მიერ გამოქვეყნებული ტექსტის თანახმად, თილერსონი მიიჩნევს, რომ აშშ-სა და რუსეთს შორის ღია და პატიოსანი დიალოგი უნდა წარიმართოს.

”რუსეთი დღეს საფრთხეს წარმოადგენს, მაგრამ არაპროგნოზირებადი არ არის თავისი ინტერესების გატარებაში”, - ნათქვამია დოკუმენტში.

მომავალი სახელმწიფო მდივნის სიტყვაში აღნიშნულია, რომ რუსეთი ”შეიჭრა უკრაინაში, დაამყარა კონტროლი ყირიმში და მხარს უჭერს სირიის მთავრობის ძალებს საომარი მოქმედებების კანონების ძალადობრივ დარღვევაში”. თილერსონის აზრით, მსოფლიო არენაზე რუსეთის როლის გაძლიერება აშშ-ის გავლენის შემცირებამ გამოიწვია.   

პრესაში თილერსონს ხშირად უწოდებდნენ ”პუტინის მეგობარს”. ის ყირიმის ანექსიის შემდეგ დასავლეთის მიერ რუსეთის მიმართ დაწესებულ სანქციებს ხშირად აპროტესტებდა.