7 წლის გოგონა, რომელიც მსოფლიომ ”ტვიტერით” გაიცნო, ალეპოდან ევაკუირებულია

საქართველო, თბილისი - 13:29 | 19.12.2016

ნანახია: 2087

7 წლის სირიელი გოგონა, ბანა ალაბედი, რომელიც ალეპოს აღმოსავლეთ ნაწილში ვითარებას ”ტვიტერში” აღწერდა, ქალაქიდან ევაკუირებულია. ამის შესახებ Syrian American Medical Society-ის წარმომადგენლებმა განაცხადეს.

კვირას საღამოს ქალაქიდან 350 ადამიანის გაყვანა მოხერხდა. ევაკუაცია დღესაც გრძელდება.

ბანა ალაბედი ”ტვიტერში” @AlabedBana-ს სახელით ინგლისურად წერს. მას ეხმარება დედა, რომელიც მასწავლებლად მუშაობდა. თავიანთ ჩანაწერებში ისინი ალყაშემორტყმული ქალაქის ცხოვრებაზე წერდნენ.

ბოლო ჩანაწერში, რომელიც კვირას გამოქვეყნდა, გოგონას დედა დახმარებისთვის თურქეთის პრემიერ-მინისტრსა და პრეზიდენტს მიმართავს. ”გთხოვთ, გააკეთოთ ყველაფერი, რათა შეთანხმების პირობები დაცული იყოს და გაგვიყვანეთ აქედან. ძალიან დავიღალეთ”, - ნათქვამია ”ტვიტერში” გამოქვეყნებულ მიმართვაში.

ალეპოელი გოგონას ჩანაწერებმა მთელი მსოფლიოს ყურადღება მიიპყრო. 5 დეკემბერს ის სოციალური ქსელიდან მოულოდნელად გაქრა, მაგრამ მოგვიანებით გაირკვა, რომ გოგონა უსაფრთხოდ იყო.

ალეპოდან მშვიდობიანი მოსახლეობის გაყვანის ოპერაცია 15 დეკემბერს დაიწყო. ამ მომენტამდე ქალაქის აღმოსაველთ ნაწილი რამდენიმე ათასმა ადამიანმა დატოვა.