თამარ ამაშუკელი - სტურუას საქმეს სისტემა შეგნებულად აფარებს ხელს

,,ირაკლი ალასანია - თავისუფალი დემოკრატების" პრესსპიკერმა თამარ ამაშუკელმა პარტიის ოფისში ბრიფინგი გამართა, რომელზეც ხაზგასმით ისაუბრა იმის შესახებ, რომ არსებობს საფუძვლიანი ეჭვი დემურ სტურუას საქმესთან დაკავშირებით. კონკრეტულად კი დემურ სტურუას თვითმკვლელობამდე მიყვანაში ბრალდებული გოდერძი თევზაძის საქმეს ამაშუკელის აზრით სისტემა შეგნებულად აფარებს ხელს. ამის საფუძველს კი იძლევა ის მტკიცებულებები, რომლებიც უკვე იქნა წარმოდგენილი გოდერძი თევზაძის ბრალეულობის დასამტკიცებლად. თამარ ამაშუკელმა ხაზი გაუსვა ქართული ოცნების მოუქნელ ნარკოპოლიტიკას და სისტემურ პრობლემებს, რომელსაც რეპრესიული და მანკიერი შეფასება მიანიჭა.

'',,თავისუფალი დემოკრატები"მოვითხოვთ გამოძიება ჩატარდეს მასშტაბურად და სრულყოფილად, რადგან მიგვაჩნია რომ მხოლოდ ერთი ბრალდებული პოლიციელი დამოუკიდებლად ვერ მიიღებდა გადაწყვეტილებას სტურუასთან ასეთი უკანონო ქმედების შესახებ. შესაძლოა და არსებობს ალბათობის მაღალი ხარისხი იმისა, რომ საქმის კურსში ყოფილიყვნენ მისი ზემდგომი პრები. საქმეში სწორედ მათი როლი უნდა გამოიკვეთოს და დადგინდეს იყვნენ თუ არა ჩართული თევზაძის ზემდგომი პირები სტურუას თვითმკვლელობამდე მიყვანაში.

ფაქტი რომ ამდენი ხანი კონკრეტული პიროვნება, რომელზეც არა მარტო საფუძვლიანი ეჭვი, არამედ მისი ბრალეულობის შესახებ საკმარისი მტკიცებულებებიც კი იყო წარმოდგენილი, არ იქნა დაკავებული და მას მიეცა შესაძლებლობა მიმალვოდა გამოძიებას. ყველაფერი ეს ბადებს საფუძვლიან ეჭვს რომ სისტემამ მას ხელი დააფარა.

დემურ სტურუა არის მსხვერპლი არა მარტო კონკრეტული სამართალდმაცავისა , რომელიც სამაგალითოდ უნდა დაისაჯოს არამედ , მანკიერი , რეპრესიული სისტემისა, რომლის რეფორმირება აუცილებელი სამართლებრივი, დემოკრატიული სახლემწიფოს მშენებლობისთვის. ჩვენთვის სრულიად მიუღებელია ის ნარკოპოლიტიკა, რომელისაც აგრძელებს ქართული ოცნება. ეს არის სრულიად ანტი ჰუმანური, საკუთარი მოქალაქეების წინააღმდეგ მიმართული პოლიტიკა რომლის შეცვლა ჩვენი ერთ-ერთი ძირითადი მიზანია", - განაცხადა თამარ ამაშუკელმა.