უკრაინელი მფრინავი ნადეჟდა სავჩენკო პატიმრობიდან გათავისუფლების შემდეგ, "კურიერისთვის" მიცემულ ინტერვიუში თბილისში, რუსეთის საელჩოსთან, მის მხარდამჭერ აქციაზე შესრულებული ხორუმის კადრებს იხსენებს:

"როცა ციხეში ერთ-ერთი რუსული არხით გავიგე, რომ სუხიშვილისა და რამიშვილის აკადემიურმა ბალეტმა ჩემს მხარდასაჭერად იცეკვა, იცით, რა გამახსენდა? ერთხელ გამიმართლა და ლვოვში მათ კონცერტზე მოვხვდი, ეს იყო რაღაც წარმოუდგენელი, საოცარი სანახაობა და ისეთი ეიფორიული გრძნობები მქონდა, ისე მომეწონა მათი ცეკვა და როცა გავიგე, რომ მე მგულშემატკივრობენ, ისე მომინდა, ეს ყველაფერი მენახა ჩემი თვალით. რუსული არხი ხომ წარმოგიდგენიათ, სულ პატარა ნაწილი აჩვენეს, მაგრამ ბედნიერი ვიყავი, რომ ვნახე. ისე მომინდა მათთან ერთად მეცეკვა. გავიფიქრე კიდეც, თუ ისინი ჩემს გამო გამოვიდნენ, იქნებ, ოდესმე მეც შევძლო მათთან ერთად ცეკვა. საოცრად ლამაზია ქართული ცეკვა," - განაცხადა სავჩენკომ.

სამშობლოში დაბრუნებული ნადია სავჩენკო უახლოეს დღეებში პოლიტიკურ საქმიანობას დაიწყებს. გავრცელებული ცნობით, უკრაინელი მფრინავი აპირებს, რადაში ეროვნული უსაფრთხოებისა და თავდაცვის კომიტეტში შევიდეს.

ის საკანონმდებლო ორგანოს დეპუტატად პარტია ბატკივშჩინას სიით 2014 წლის ნოემბრიდან ირიცხება. პეტრე პოროშენკოსთან გამართული მოლაპარაკების შემდეგ ნადია სავჩენკო ფრაქციის წევრებსაც შეხვდა.

უკრაინის პრეზიდენტის საიტზე პეტიციაც გამოქვეყნდა, რომელშიც პოროშენკოს სავჩენკოს თავდაცვის მინისტრის პოსტზე დანიშვნისკენ მოუწოდებენ.