"გონება შეზღუდული ადამიანი, რომელსაც ნამდვილად უჭირს სწორი დასკვნების გამოტანა და თქვა, რომ ეს იყო ნაციონალური მოძრაობის მიერ ჩადენილი საქციელი", - ეს განცხადება "ნაციონალური მოძრაობის" ერთ-ერთმა ლიდერმა ეკა ხერხეულიძემ გადაცემაში "P.S" გააკეთა.

მისივე თქმით, დღეს სოფელ კორცხელში მომხდარი ინციდენტი იყო ხელისუფლების და საქართველოს ყოფილი პრემიერ-მინისტრის, ბიძინა ივანიშვილის მიერ წინასწარ დაგეგმილი. 

"ვიცე-პრემიერი კალაძე აცხადებდა, სხვათა შორის ისიც გახლავთ კუნთმაგარი და გონება შეზღუდული ადამიანი, რომელსაც ნამდვილად უჭირს სწორი დასკვნების გამოტანა და თქვა, რომ ეს იყო ნაციონალური მოძრაობის მიერ ჩადენილი საქციელი. თურმე გიგა ბოკერია ხელმძღვანელობდა ამ ზონდერ ჯგუფებს და თურმე საკუთარი თავი აცემინა გიგა ბოკერიამ და საკუთარი თანაპარტიელები. რა მდგომარეობაშია მისი აზროვნების კოეფიციენტი ალბათ ხვდებით. კალაძესაც და სხვებსაც მინდა შევახსენო, რომ ამგვარი არგუმენტები არც ერთ შემთხვევაში არ იქნება გაზიარებული საზოგადოების მხრიდან. ვინაიდან "ნაციონალურმა მოძრაობამ" მოახერხა და არჩევნების გზით გადააბარა ხელისუფლება. ასე რომ თუ კი შესაძლებელი იქნებოდა ძალმომრეობით ძალაუფლების შენარჩუნება, რომელსაც ივანიშვილი ცალსახად დეკლარირებს, ამის შესაძლებლობა ჰქონდა "ნაციონალურ მოძრაობას".

ნამდვილი ზომბები გადმოხტნენ, მწყობრი კოლონებით გამოვიდნენ და კონკრეტული ადრესატების, კონკრეტული გვარების მისამართით ავლენდნენ საკუთარ აგრესიას. ბოდიში ჟარგონისთვის, მაგრამ ამბობდნენ, რომ დასაბრედია ბოკერია და არ უნდა გადარჩეს ცოცხალი, რომ გუნავა უნდა მოკლან და ა.შ. გამორჩეული სიბრიყვით გამორჩეული ადამიანები გვყავდა დღეს, მე დარწმუნებული ვარ, რომ მართლა არ იცოდნენ სად იყვნენ, მათ მხოლოდ და მხოლოდ იცოდნენ ის, რომ იყვნენ სამეგრელოში,“-განაცხადა ეკა ხერხეულიძემ.