პრემიერმინისტრი გიორგი კვირიკაშვილი საქართველოსა და რუსეთის საგარეო საქმეთა მინისტრების შესაძლო შეხვედრას გამოეხმაურა. მისი თქმით, თუ ასეთი გადაწყვეტილებები მომზადდება ისინი, უპირველეს ყოვლისა დაფუძნებული იქნება საქართველოს ტერიტორიული მთლიანობის და სუვერენიტეტის პრინციპზე.

"თუ ასეთი გადაწყვეტილებები მომზადდება, და ისინი, უპირველეს ყოვლისა, განამტკიცებს და დაფუძნებული იქნება საქართველოს ტერიტორიული მთლიანობის და სუვერენიტეტის პრინციპზე, რა თქმა უნდა, მზად ვიქნებით, რომ ასეთ შეხვედრაში მივიღოთ მონაწილეობა. მიხეილ ჯანელიძის განცხადება სწორედ ამას გამოხატავდა და ვფიქრობ, რომ არაფერი მოულოდნელი ამაში არ უნდა ყოფილიყო. ვფიქრობ, რუსეთთან გვჭირდება ურთიერთობის ნორმალიზაცია. სამწუხაროდ, დღეს ჩვენი ურთიერთობები არის ჩიხში შესული და ვფიქრობ, ამ ჩიხიდან უნდა გამოვიდეთ. მაგრამ ამ ჩიხიდან უნდა გამოვიდეთ არა კომპრომისების ხარჯზე ჩვენი სუვერენიტეტისა და ტერიტორიული მთლიანობის საკითხებში, არამედ მაქსიმალური კონსტრუქტივიზმის ხარჯზე და სწორედ ამისკენ არის მიმართული ის არაერთი ფორმატი, რომელიც ჩვენ რუსეთთან ურთიერთობაში გვაქვს. ამიტომ მიხეილ ჯანელიძის განცხადება იყო აბსოლუტურად ადეკვატური და გასაკვირი ამაში არაფერია", - თქვა პრემიერმა.

საქართველოს საგარეო საქმეთა მინისტრმა მიხეილ ჯანელიძემ  რუს კოლეგასთან შესაძლო შეხვედრასთან დაკავშირებით განაცხადა, რომ საქართველო რუსეთთან საერთაშორისო დისკუსიებით განსაზღვრული ფორმატებით მუშაობს. მისი თქმით, ”შესაბამისი გარემოებებისა და მომზადების შემთხვევაში შესაძლოა რუს კოლეგა სერგეი ლავროვს შეხვდეს“.