3-7 მაისს საქართველოს შვედეთის მოგზაურთა სამეფო კლუბის წევრები ეწვევიან. კლუბში გაწევრიანებული არიან სამეფო ოჯახისა და მთავრობის წევრები, ცნობილი საზოგადო მოღვაწეები, ბიზნესმენები, მეცნიერები, ხელოვანები, კინემატოგრაფისტები და ჟურნალისტები. 

კლუბის წევრები საქართველოში ვიზიტის ფარგლებში ეწვევიან საქართველოს სხვადასხვა კუთხეს, მოინახულებენ საქართველოს ეროვნულ მუზეუმს, ისტორიულ ძეგლებს, გაეცნობიან ქართულ ხელოვნებას, ტიხრული მინანქრისა და ტრადიციული სამოსელის ისტორიას. შვედი სტუმრები მონაწილეობას მიიღებენ ღვინის დეგუსტაციაში და გაეცნობიან ქართული ღვინის დამზადების უნიკალურ ტრადიციას.

საქართველოში ვიზიტის ფარგლებში დაგეგმილია შვედეთის მოგზაურთა სამეფო კლუბის წევრების შეხვედრა საქართველოს საგარეო საქმეთა მინისტრის მოადგილესთან გიგი გიგიაძესთან და საგანგებო დავალებათა ელჩთან კონსტანტინე ქავთარაძესთან. სტუმრები გაეცნობიან საქართველოს ევროკავშირში ინტეგრაციასთან და საქართველო-შვედეთის ორმხრივ ურთიერთობებთან დაკავშირებულ საკითხებს.

2015 წელს, შვედეთში საქართველოს ყოფილი ელჩის კონსტანტინე ქავთარაძის ორგანიზებით კლუბის წევრებისთვის გაიმართა პრეზენტაცია საქართველოს შესახებ, რომლის ფარგლებშიც ელჩმა ისაუბრა ქვეყნის ისტორიაზე, ტრადიციებზე, ქართულ ენასა და ანბანზე, საქართველოს ტურისტულ პოტენციალზე და საინვესტიციო გარემოზე. 

შეხვედრის შემდგომ შვედეთის მოგზაურთა კლუბის წევრების ინიციატივით დაიგეგმა საქართველოში მოგზაურობა და ქვეყნის ღირსშესანიშნაობების ადგილზე გაცნობა.