,,ქართული ოცნების“ წევრი თამაზ მეჭიაური ამერიკელი კონგრესმენის მიერ ბიძინა ივანიშვილისთვის ანგარიშების გაყინვის შესახებ გაკეთებულ განცხადებას ეხმაურება და აცხადებს, რომ სტივ რასელმა არ უნდა მართოს ეს ქვეყანა. მისი თქმით, ის პოლიტიკური ჯგუფები, რომელთაც ქვეყანაში არ გააჩნიათ მხარდაჭერა, აალაპარაკებენ ,,სხვა რასელებსაც“

,,იმის გამო, რომ ვიღაცა რასელი ვიღაცას დააშანტაჟებს... რასელმა მიხედოს თავის ქვეყანას, რაც არ უნდა დიდი იყოს ის ქვეყანა იმიტომ, რომ რასელებმა კი არ უნდა მართონ ეს ქვეყანა, უნდა მართოს ხალხმა და ხალხი ვისაც არჩევს, იმან. ერთხელ და სამუდამოდ, ვისწავლოთ ჩვენი არჩევანის პატივისცემა. ამოქმედდა უკვე მე-5 კოლონა და ცდილობენ საქართველოს სხვა კარიდან შემოვიდნენ პარლამენტში. მოსახლეობაში მხარდაჭერა არ გააჩნია ზოგ პოლიტიკურ ძალას, ზოგი რასელს აალაპარაკებს, ზოგი - სხვა რასელს ან სხვა რომელიმე გვარისას და ა.შ. ახლა ამას იმიტომ ვლაპარაკობ, რომ ანგარიშებს ვერ დამიყადაღებენ სადმე - არ გამაჩნია და იმიტომ», - განაცხადა მეჭიაურმა.

ამერიკელი კონგრესმენი სტივ რასელი ბიძინა ივანიშვილის ანგარიშების გაყინვას მოითხოვს. რასელმა კონგრესის წარმომადგენელთა პალატის სხდომაზე საქართველოს ყოფილ პრემიერ-მინისტრს პუტინის მოკავშირე უწოდა და აღნიშნა, რომ ის ზეგავლენას ახდენს პოლიტიკურ პროცესებზე საქართველოში.