საქართველოს პრემიერმინისტრი მიიჩნევს, რომ მსუბუქი ნარკოტიკის მოხმარება სახელმწიფოში არ უნდა იყოს წახალისებული. თუმცა, გიორგი კვირიკაშვილი ფიქრობს, რომ მსუბუქი ნარკოტიკის მოხმარებისთვის ადამიანებს ციხეში არ უნდა სვამდნენ.

„ჩემი პირადი აზრია, რომ ჩვენ არავითარ შემთხვევაში არ უნდა წავახალისოთ თუნდაც მსუბუქი ნარკოტიკის მოხმარება და შეფასებები ამ საკითხთან მიმართებაში, უნდა იყოს ერთმნიშვნელოვანი. რაც შეეხება იმას, რომ ახალგაზრდა, რომელმაც მსუბუქი ნარკოტიკი მოიხმარა, დავაპატიმროთ, ვფიქრობ, ეს არასწორი გადაწყვეტილებაა. შესაძლოა, ჩვენ ამით ამ ახალგაზრდას დავუნგრიოთ სიცოცხლე და მოვუსპოთ იმის შანსი, რომ  მომავალში აღარ მოიხმაროს ეს ნარკოტიკი“, - განაცხადა კვირიკაშვილმა ჟურნალისტებთან შეხვედრისას.

რაც შეეხება მსუბუქი ნარკოტიკის ლეგალიზაციას, პრემიერმინისტრი ამბობს, რომ ის ლეგალიზაციის კატეგორიული წინააღმდეგია.

„ჩვენ ლეგალიზაცია უნდა გავაკეთოთ. რაც შეეხება დეკრიმინალიზაციას, ჩემი პასუხია, რომ მსუბუქი ნარკოტიკის მოხმარებისთვის ადამიანები ციხეში არ უნდა ჩავსვათ“, - აღნიშნა გიორგი კვირიკაშვილმა.