ქვეყნისთვის და მთავრობისთვის უმთავრეს პრიორიტეტად რჩება ქვეყნის ევროატლანტიკური და ევროპული ინტეგრაცია, - ამის შესახებ პრემიერ-მინისტრმა გიორგი კვირიკაშვილმა ჟურნალისტებთან შეხვედრისას განაცხადა.

„ეს არის ჩვენი ამომრჩევლის, მოქალაქეების დაკვეთა და არც ერთ მთავრობას არ აქვს უფლება, ამ დაკვეთას გადაუხვიოს.  ეს არავითარ შემთხვევაში არ გულისხმობს იმას, რომ ჩვენ ნებისმიერ საერთაშორისო ფორმატზე, სადაც კი ვიმყოფებით, გავკიოდეთ, ამ სიტყვის  პირდაპირი მნიშვნელობით, რომ ტანკის ლულა გვაქვს მოშვერილი, სნაიპერებს დამიზნებული ჰყავთ საქართველოს ავტობანზე მომავალი ტრაილერები და ასე შემდეგ. როგორ წარმოგიდგენიათ, ჩვენ განვავითაროთ ეკონომიკა, მოვიზიდოთ ინვესტიციები და პარალელურად, მუდმივად გავკიოდეთ, რომ ჩვენ რუსული სამხედრო ბაზები გვაქვს ტერიტორიაზე, არიქა, გვიშველეთ, გადაგვარჩინეთ. ეს უკვე ტაქტიკის საკითხია, როგორ მივიტანთ ამ პრობლემას პარტნიორებამდე, როგორ დავაბალანსებთ გზავნილებს ისე, რომ ერთი მხრივ, ჩვენი საკითხი დავტოვოთ ჩვენი პარტნიორების დღის წესრიგში და მეორე მხრივ, შევქმნათ იმდენი სტაბილურობის განცდა, რომელიც საჭიროა საერთაშორისო ინვესტიციების მოსაზიდად. ამ ამოცანას ჩვენ ძალიან წარმატებით გავართვით თავი“. - განაცხადა გიორგი კვირიკაშვილმა.