თბილისში მიმდინარე პროექტების მონიტორინგი აქტიურ რეჟიმში მიმდინარეობს. დედაქალაქის მერი დავით ნარმანია, რაიონების მიხედვით, მიმდინარე სამუშაოებსა და მოსახლეობის საჭიროებებს პირადად ეცნობა. დავით ნარმანია დღეს ნაძალადევის რაიონში გამგებელთან, ზაზა გაბუნიასთან და მაჟორიტარ დეპუტატთან, ჯაბა სამუშიასთან ერთად იმყოფებოდა, სადაც მასშტაბური ინფრასტრუქტურული სამუშაოები მიმდინარეობს.

„ვხვდებით მოსახლეობას, ვეცნობით მათ საჭიროებებს, გარდა ამისა, ვაკეთებთ პროექტების მონიტორინგს, ძალიან ბევრი რამ კეთდება ნაძალადევის რაიონში, როგორც შიდა კვარტალური გზები, ასევე, სათამაშო მოედნები, შადრევნები. გამწვანდება ის ტერიტორიები, რომლებიც დაგეგმილი გვაქვს, როგორც გასამწვანებელი ტერიტორიები, დამატებით, ახალი საბავშვო ბაღის მშენებლობას ვიწყებთ თემქაზე, რომლის პროექტიც უკვე მზადდება და წელსვე დავიწყებთ სამშენებლო სამუშაოებს პროექტის საფუძველზე. ასე რომ, ძალიან აქტიურად ვხვდებით ხალხს, ვუსმენთ, ვინიშნავთ მათ საჭიროებებს და მაქსიმალურად ეფექტიანად და სწრაფად ვაგვარებთ ამ საკითხებს“, - განაცხადა თბილისის მერმა, დავით ნარმანიამ.

ნაძალადევის რაიონში, უიარაღოს ქუჩაზე წესრიგდება გზის საფარი, იგება ასფალტი 7524 კვადრატულ მეტრ ფართობზე. სამუშაოების ფარგლებში, რეაბილიტაცია ჩაუტარდება ტროტუარებს და მოეწყობა ბორდიურები. საგზაო სამუშაოების დაწყებამდე ქუჩაზე გამოიცვალა მიწისქვეშა კომუნიკაციის პრობლემური მონაკვეთები. აღნიშნული პროექტის საერთო ღირებულება 346,304 ლარია.

პარალელურად, ნაძალადევში, გუდამაყრის ქუჩის კაპიტალური რეაბილიტაცია მიმდინარეობს. სამუშაოები თემქის ცენტრალურ გზებსა და შიდაკვარტალურ ეზოებშიც ტარდება.

მიმდინარეობს ანაპის ქუჩაზე მდებარე სკვერის აღდგენითი ღონისძიებები, ტერიტორიაზე მთლიანად იცვლება ასფალტ-ბეტონის საფარი, მოპირკეთდება ზედაპირი. პროექტის მიხედვით, რეაბილიტაცია უტარდება სკვერში არსებულ აუზსა და შადრევანს. მიმდინარეობს ინფრასტრუქტურის მოწესრიგება, მონტაჟდება ხის პანელები, სკამები, იცვლება სკვერში არსებული განათებები. წესრიგდება მწვანე საფარი.

ამ დროისათვის, ნაძალადევის რაიონში კიდევ 6 სკვერისა და გზის გამყოფის სარეაბილიტაციო სამუშაოები მიმდინარეობს.