აჭარის ნაერთი ბიუჯეტის 9 თვის გეგმა 17 %-იანი გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, იანვარ-სექტემბერში აჭარის ნაერთი ბიუჯეტის გეგმა 160 მლნ 373 ათას 500 ლარი იყო, თუმცა საანგარიშო პერიოდისთვის ბიუჯეტის შესრულებამ 187 მლნ 179 ათას 800 ლარი შეადგინა, ანუ გეგმა 116.7 %-ით შესრულდა. სტატისტიკური ინფორმაციის მიხედვით, ნაერთი ბიუჯეტის გადასახადების მუხლი იანვარ-სექტემბრის მდგომარეობით 116.4 %-ითაა შესრულებული, სხვა შემოსავლების მუხლი - 115.8 %-ით, ხოლო არაფინანსური აქტივების მუხლი კი - 123.1 %-ით.

რაც შეეხება აჭარის რესპუბლიკური ბიუჯეტის გეგმას, ის 18 %-იანი გადაჭარბებითაა შესრულებული. აჭარის ფინანსთა და ეკონომიოკის სამინისტროს სტატისტიკური ინფორმაციის მიხედვით, რესპუბლიკური ბიუჯეტის იანვარ-სექტემბრის გეგმა 117 მლნ 933 ათას 700 ლარი იყო, თუმცა 1 ოქტომბრის მდგომარეობით გეგმა 118,1 %-ითაა შესრულებული, რაც იმას ნიშნავს, რომ ბიუჯეტში 139 მლნ 264 ათას 300 ლარის აკუმულირება დაფიქსირდა.

რეგიონის თვითმართველ თუ მუნიციპალურ ორგანოების ბიუჯეტების სტატისტიკურ ინფორმაციას თუ გადავხედავთ, ყველაზე მაღალი შესრულების მაჩვენებელი შუახევის ბიუჯეტმა დააფიქსირა- 205.5 %-ი. რაც შეეხება სხვა ერთეულებს: ქობულეთი - 146.4 %-ი, ხულო - 121.9 %-ი, ბათუმი - 110.5 %-ი, ხელვაჩაური - 104.1 %-ი. რაც შეეხება ქედას ბიუჯეტს, აქ გარღვევაა, რადგანაც იანვარ-სექტემბრის გეგმა მხოლოდ 47.7 %-ითაა შესრულებული.