ერაყელმა სამხედროებმა ”ისლამური სახელმწიფოს” ერთ-ერთი მეთაურის თარხან ბათირაშვილის, იგივე ომარ ალ შიშანის ცხედარი ქალაქ რამადთან იპოვეს.

ამის შესახებ ადგილობრივ მედიას ანბარის პროვინციაში სამხედრო ოპერაციის მეთაურმა გენერალმა ისმაილ ალ-მახლავიმ განუცხადა.

მისი მტკიცებით, სამხედროებმა დასახელებული პუნქტის ელ-ბუეიდის დათვალიერებისას ”ისლამური სახელმწიფოს” 10 მებრძოლის , მათ შორის ომარ ალ შიშანის ცხედარს მიაგნეს.

მარტის დასაწყისში პენტაგონმა განაცხადა, რომ ალ შიშანი ავია-დარტყმებისას დაიღუპა.

საჰაერო იერიში ავტოკოლონის წინააღმდეგ, რომლითაც თარხან ბათირაშვილი გადაადგილდებოდა, ქალაქ შადადთან 4 მარტს განხორციელდა.

პანკისელი ალ შიშანი ”ისლამური სახელმწიფოს” ხელმძღვანელობაში რამდენიმე მნიშვნელოვან თანამდებობას იკავებდა, მათ შორის ”სამხედრო მინისტრის” პოსტსაც.