დღეს, აჭარის ტურიზმისა და კურორტების დეპარტამენტში ორგანიზაცია "პროსერვისის" ორგანიზებით და აჭარის ტურიზმის დეპარტამენტის ხელშეწყობით, ახალი ონლაინ პროგრამის - „სასტუმროების მართვისა და ონლაინ დაჯავშნის სისტემების" პრეზენტაცია გაიმართა.

ღონისძიებას აჭარის ტურიზმისა და კურორტების დეპარტამენტის ხელმძღვანელი მამუკა ბერძენიშვილი, პროექტის ხელმძღვანელი რევაზ ნატროშვილი და აჭარაში მოქმედი სასტუმროების წარმომადგენლები ესწრებოდნენ.

პროგრამა სიახლეა საქართველოს ბაზარზე და მიზნად ისახავს, მცირე და საშუალო ტურისტული ბიზნესის ხელშეწყობას. პროექტის მთავარ სეგმენტს წარმოადგენენ საქართველოს მთელ ტერიტორიაზე განთავსებული სასტუმროები და განსაკუთრებით, აჭარის ტურისტული ზონის მცირე და საშუალო ზომის სასტუმროები.

ელექტრონული სერვისით, სასტუმროების პოტენციურ სტუმრებს, შეეძლებათ ონლაინ რეჟიმში შეამოწმონ სასურველ სასტუმროში თავისუფალი ნომრები. ასევე, შეეძლებათ ონლაინ დაჯავშნა პლასტიკური ბარათით და გადახდა როგორც პირდაპირი გადახდის, ასევე ადგილზე, მოგვინებითი გადახდის პირობით.

შეთავაზება განსაკუთრებით საინტერესოა იმ სასტუმროებისათვის, რომლებსაც არ აქვთ ვებ გვერდი. პროექტის ფარგლებში, ასეთი სასტუმროები „სასტუმროს მართვისა და ონლაინ დაჯავშნის სისტემის" პროგრამულ უზრუნველყოფასთან ერთად, ვებ გვერდს და 1 გბ ჰოტინგს მიიღებენ.

 „სასტუმროების მართვისა და ონლაინ დაჯავშნის სისტემის" ინტეგრაცია სასტუმროებისათვის უკვე დაწყებულია და ეტაპობრივად მიმდინარეობს. ასევე გათვალისწინებულია ტრენინგები აჭარის რეგიონის სასტუმროების წარმომადგენლებისთვის. ტრენინგები მიმდინარე წლიდან უსასყიდლოდ ჩატარდება პროსერვისის ტექნოლოგიური ექსპერტების მიერ.