ბოლო 14 თვის განმავლობაში ”ისლამურმა სახელმწიფომ” სირიისა და ერაყის ტერიტორიების 22 და შემოსავლების 40 პროცენტი დაკარა. ამის შესახებ ბრიტანეთის კვლევითი ინსტიტუტის IHS Jane's-ის მოხსენებაშია ნათქვამი.

დოკუმენტში აღნიშნულია, რომ გასული წლის განმავლობაში ამერიკისა და რუსეთის ავიაიერიშების შედეგად ტერორისტულმა ორგანიზაციამ ტერიტორიების 14 პროცენტი დაკარგა. 2016 წლის პირველ სამ თვეში კი ეს დანაკარგები კიდევ 8 პროცენტით გაიზარდა.

ამის გარდა ”ისლამური სახელმწიფო” თავისი შემოსავლების 40 პროცენტსაც დაემშვიდობა, რაც ძირითადად სირია-თურქეთის საზღვარზე კონტროლის დაკარგვამ გამოიწვია.

სპეციალისტები აღნიშნავენ, რომ ამ დანაკარგებმა, ასევე იმ ფაქტმა, რომ უკანასკნელი თვეების განმავლობაში ”ისლამური სახელმწიფოს” ხელმძღვანელობის რამდენიმე წევრი დაიღუპა ან ტყვედ ჩავარდა, ტერორისტების პოზიციები მნიშვნელოვნად შეასუსტა.