საქართველოში სისტემური კორუფცია არ არსებობს, - ამის შესახებ პარლამენტში გამოსვლისას გენერალურმა პროკურორმა გიორგი გვარაკიძემ განაცხადა. მან პარტია „გახარია საქართველოსთვის“ წევრის, გიორგი შარაშიძის კითხვას უპასუხა, რომელიც ქვეყანაში სისტემური კორუფციის არსებობას შეეხებოდა.

გვარაკიძის თქმით, პროკურატურის მიერ გამოძიებული საქმეები ცალკეული პირების მიერ ჩადენილ დანაშაულებს უკავშირდება და არა სისტემურად ორგანიზებულ კორუფციულ სქემებს.

მისი თქმით, პროკურატურას არასდროს დაუხევია უკან თანამდებობის პირისა და ავტორიტეტული ადამიანის მიერ ჩადენილ დანაშაულზე, ყოველთვის შესაბამისი რეაგირება მოუხდენიათ და მომავალშიც ასე აპირებენ, რომ გააგრძელონ, რადგან კორუფციასთან ბრძოლა პროკურატურისათვის ერთ-ერთი პრიორიტეტული საკითხია.

მისივე განმარტებით, კორუფციის წინააღმდეგ ბრძოლა პროკურატურის ერთ-ერთ მთავარ პრიორიტეტად რჩება და უწყება რეაგირებას ახდენს როგორც რიგითი მოქალაქეების, ისე მაღალი თანამდებობის პირებისა და გავლენიანი ფიგურების მხრიდან ჩადენილ დანაშაულებზე.

„სისტემური კორუფცია არ არის ის, რა საქმეებსაც ჩვენ ვიძიებთ - ეს არ ნიშნავს სისტემურ კორუფციას. კორუფცია ყოველთვის იყო, არის და იქნება - ჩვენ ამას ვერ ამოვწურავთ, წარმოუდგენელი საკითხია. სისტემური კორუფცია ნიშნავს, როცა დავალებული აქვს ხელმძღვანელს და ჩაშლილია, რომ ყველამ რაღაც უნდა გააფუჭოს. ჩვენს მიერ გამოძიებული საქმეებისა და იმ შედეგების ხელშესახები შედეგების მიხედვით ჩანს, რომ ადამიანებმა ჩაიდინეს ინდივიდუალური და კონკრეტული დანაშაულები. აქედან გამომდინარე, ეს არ არის სისტემური დანაშაული", - განაცხადა გვარაკიძემ.

გენერალურმა პროკურორმა ასევე უპასუხა კითხვას, უნდა დადგეს თუ არა იმ ხელმძღვანელი პირების პასუხისმგებლობის საკითხი, რომელთა დაქვემდებარებაში მყოფი საჯარო მოხელეები კორუფციულ დანაშაულებში არიან მხილებული. გვარაკიძის თქმით, საქართველოს კანონმდებლობა კოლექტიურ პასუხისმგებლობას არ ითვალისწინებს და მხოლოდ დაქვემდებარებული თანამშრომლის მიერ ჩადენილი დანაშაული ხელმძღვანელის სისხლისსამართლებრივი დევნის საფუძველი ვერ გახდება.