უკრაინის პრეზიდენტი ვოლოდიმირ ზელენსკი დარწმუნებულია, რომ ნატო-მ რუსეთის მიერ ბელარუსში განლაგებული „ორეშნიკის“ საშუალო რადიუსის რაკეტები ლეგიტიმურ სამხედრო სამიზნედ უნდა განიხილოს.

ამის შესახებ უკრაინის პრეზიდენტმა ბელარუსის ოპოზიციურ მედიასაშუალება „ზერკალოსთან“ ინტერვიუში განაცხადა.

ზელენსკიმ აღნიშნა, რომ რუსეთი და ბელარუსი „შოუს“ დგამენ „ორეშნიკის“ სისტემის ბელარუსის ტერიტორიაზე განლაგებით, რადგან მთელი სისტემა ჯერ არ არის იქ მიწოდებული, მხოლოდ „შესაბამისი მანქანებია“.

მისი აზრით, ამ ქმედებების მიზანი ევროპის დაშინებაა.

„ჩემი აზრით, ნატო-მ „ორეშნიკი“ ლეგიტიმურ სამიზნედ უნდა მიიჩნიოს. უკრაინა, თავის მხრივ, შეაფასებს ამ საფრთხეს... მაგრამ მან (ალექსანდრ ლუკაშენკამ) არ უნდა ითამაშოს თამაშები, რადგან ამ ნაბიჯების შემდეგ, ლუკაშენკასთან კონსულტაციის გარეშე, რუსებს „ორეშნიკი“ ბელარუსში შეაქვთ“, - განაცხადა ზელენსკიმ.