საქართველოს მეხუთე პრეზიდენტი, სალომე ზურაბიშვილი 17 ოქტომბერს გაგზავნილ წერილზე ევროკავშირის უმაღლესი წარმომადგენლის საგარეო საქმეთა და უსაფრთხოების პოლიტიკის საკითხებში, კაია კალასის პასუხს აქვეყნებს.

კაია კალასის განცხადებით, საქართველოს დემოკრატიული უკუსვლისა და ადამიანის უფლებების დარღვევისთვის პასუხისმგებელი პირების მიმართ პოტენციური სანქციების შესახებ დისკუსიები გრძელდება.

„4 ნოემბერს გამოქვეყნებულმა ევროკომისიის ყოველწლიურმა ანგარიშმა საქართველოზე დაადასტურა, რომ საქართველოს ხელისუფლების მიერ გადადგმული ნაბიჯები ვერ აკმაყოფილებს ევროკავშირის მოლოდინებს კანდიდატი ქვეყნის მიმართ და რომ საქართველოს ევროკავშირში გაწევრიანების პროცესი ფაქტობრივად შეჩერებულია”, - აღინიშნება წერილში.

კაია კალასი წერს, რომ ბოლო თვეების განმავლობაში საქართველოს ხელისუფლებასთან პოლიტიკური კონტაქტები შემცირდა, ხოლო ხელისუფლებისთვის განკუთვნილი ფინანსური დახმარება შეჩერდა.

"ბოლო თვეების განმავლობაში, საქართველოს ხელისუფლებასთან პოლიტიკური კონტაქტები შემცირდა და ხელისუფლებისთვის გაწეული ფინანსური დახმარება შეჩერებულია. საქართველოს დემოკრატიული უკუსვლისა და ადამიანის უფლებების დარღვევისთვის პასუხისმგებელი პირების მიმართ პოტენციური სანქციების შესახებ დისკუსიები გრძელდება. 2025 წლის 27 იანვრიდან, ევროკავშირსა და საქართველოს შორის ვიზების გამარტივებული რეჟიმის შეთანხმების ნაწილობრივი შეჩერების გამო, ქართველ დიპლომატებსა და თანამდებობის პირებს ევროკავშირის ვიზებზე განაცხადის შეტანა მოეთხოვებათ. კომისია წლის ბოლომდე გამოაქვეყნებს ვიზის შეჩერების მექანიზმის ფარგლებში მერვე ანგარიშს, რომელშიც შეაფასებს, თუ როგორ შეასრულა საქართველოს ხელისუფლებამ წინა ანგარიშში მოცემული რეკომენდაციები და განსაზღვრავს შესაძლო შემდგომ ზომებს.

ამ კონტექსტში, ჩვენ კვლავ ერთგულნი ვრჩებით ხალხთაშორისი კონტაქტების, დამოუკიდებელი მედიის, სამოქალაქო საზოგადოების წარმომადგენლებისა და ახალგაზრდების მხარდაჭერის. ჩვენ გავაგრძელებთ დეზინფორმაციული ნარატივების აქტიურად წინააღმდეგობის გაწევას და მტკიცედ დავუდგებით ქართველ ხალხს და მათი ევროპული მომავლისკენ მისწრაფებებს," - წერს კაია კალასი.