საიუბილეო ღონისძიება სამხედრო ორკესტრმა საქართველოს სახელმწიფო ჰიმნით გახსნა.

თავდაცვის მინისტრმა არტილერისტებს პროფესიული დღე მიულოცა და მომავალ საქმიანობაში წარმატებები უსურვა.

„არტილერისტებს მინდა მივულოცო პროფესიული დღე. აქაც, ამ ბრიგადაშიც, როგორც ხონში, იმართება ღონისძიება და მინდა, აქედან შევეხმიანო II საარტილერიო ბრიგადის მთელ შემადგენლობას, მეთაურს, ყველას მინდა წარმატება ვუსურვო; ქვეყანას არ დასჭირვებოდეს მათი სამსახური, თუმცა, დარწმუნებული ვარ, რომ ისევე, როგორც მთელი ამ 24 წლის განმავლობაში, თავგანწირვით და მხედრული მამაცობით გვერდში დაუდგებიან. ჩვენ, რა თქმა უნდა, დღევანდელ დღეს მადლიერები ვართ, ვიხსენებთ გმირებს, რომლებიც, სწორედ, ამ საარტილერიო ბრიგადებიდან იცავდნენ ჩვენი ქვეყნის ღირსებას ყველა ომში, რომელიც საქართველომ გადაიტანა და კვლავ იმედიანად ვართ“, - განაცხადა თინათინ ხიდაშელმა.

გენერალური შტაბის უფროსმა, გენერალ-მაიორმა ვახტანგ კაპანაძემ სამხედრო მოსამსახურეებს სიტყვით მიმართა, ქვეყნის წინაშე ღირსეული სამსახურისთვის მადლობა გადაუხადა და საქართველოს შეიარაღებულ ძალებისთვის არტილერიის მნიშვნელობაზე ისაუბრა.
საზეიმო ღონისძიება დაჯილდოების ცერემონიალით გაგრძელდა. თავდაცვის მინისტრმა და გენერალური შტაბის უფროსმა ოფიცრები სამსახურებრივი მოვალეობის შესრულებისას გამოვლენილი მაღალი პროფესიონალიზმისათვის დააჯილდოვეს. მათ ვიცე-პოლკოვნიკ დავით გვალიას, მაიორებს - გოჩა დავითაძეს, ზურაბ რუსიშვილს, იოსებ ყაჯრიშვილს და კაპიტან ბესიკ მჟავანაძეს საშტატო იარაღები გადასცეს. დღესვე, არტილერისტებს გენერალური შტაბის უფროსის, აღმოსავლეთის სარდლისა და I საარტილერიო ბრიგადის მეთაურის სახელით მადლობა გამოუცხადეს.
თავდაცვის მინისტრმა და გენერალური შტაბის უფროსმა, სტუმრებთან ერთად, ბრიგადის შეიარაღება და ტექნიკა დაათვალიერეს.

ღონისძიებას თავდაცვის სამინისტროსა და გენერალური შტაბის ხელმძღვანელი პირები, ბრიგადის პირადი შემადგენლობა, ვაზიანის I საშუალო სკოლის პედაგოგები და მოსწავლეები, ასევე სამხედროების ოჯახის წევრები დაესწრნენ.