ბრიტანელი ექსპრესიონისტის ფრენსის ბეკონის 30 მლნ ევროდ შეფასებული ხუთი ნახატი მადრიდში კერძო სახლიდან მოიპარეს. ამის შესახებ ესპანური გამოცემა El Pais-ი წერს.

ძარცვა, რომელსაც ესპანეთში ბოლო რამდენიმე ათწლეულის განმავლობაში უმსხვილესი უწოდეს, 2015 წლის ივნისში მოხდა. ტილოები მადრიდის ცენტრში მდებარე ერთ-ერთი სახლიდან მოიპარეს. სახლის მფლობელის ვინაობა არ სახელდება. ცნობილია მხოლოდ რომ ის ესპანელია და ბეკონის მეგობარი იყო.

El Pais-ი აღნიშავს ,რომ დანაშაული კარგად დაცულ, ფეშენებელურ რაიონში მოხდა. სახლი ესპანეთის სენატის შენობის გვერდით მდებარეობს.

სახლის მფლობელმა ძარცვის შესახებ პოლიციას მაშინვე აცნობა, თუმცა ინფორმაცია მთელი ამ ხნის განმავლობაში გასაიდუმლოებული იყო და ცნობილი მხოლოდ დღეს გახდა.

დამნაშავეების ძებნა ესპანეთსა და მის ფარგლებს გარეთ მიმდინარეობს, თუმცა უშედეგოდ. პოლიციელთა ვერსიით, ტილოები ჯერ კიდევ ესპანეთის ტერიტორიაზე იმყოფება.

ინგლისელი მხატვარი ფრენსის ბეკონი, რომელიც 1992 წელს მადრიდში გარდაიცვალა, მეოცე საუკუნის ერთ-ერთ უდიდეს მხატვარად არის აღიარებული. ხელოვნებათმცოდნეები მის შემოქმედებაში პიკასოს, სიურეალისტებისა და გერმანელი ექსპრესიონისტების გავლენას ხედავენ, თუმცა თავად მხატვარი ამტკიცებდა, რომ უბრალოდ რეალისტი იყო.