სომხეთის პრემიერ-მინისტრმა ნიკოლ ფაშინიანმა განაცხადა, რომ საერთაშორისო საზოგადოება იხრება ფორმულისკენ, რომ სომხეთმა და აზერბაიჯანმა უნდა აღიარონ ერთმანეთის ტერიტორიული მთლიანობა. მისი თქმით, მთიანი ყარაბაღის სომეხთა უსაფრთხოებისთვის უნდა იყოს ბაქო-სტეპანაკერტის დიალოგი.

„საერთაშორისო საზოგადოება სულ უფრო მეტად იხრება იმ ფორმულისკენ, რომლის მიხედვითაც, სომხეთმა და აზერბაიჯანმა წინაპირობების გარეშე უნდა აღიარონ ერთმანეთის ტერიტორიული მთლიანობა – 29 800 კვ.კმ და 86 600 კვ.კმ ფარგლების შესაბამისად, მთიანი ყარაბაღის სომეხთა უფლებებისა და უსაფრთხოების უზრუნველყოფის გარშემო ბაქოსა და სტეპანაკერტს შორის ადგილი უნდა ჰქონდეს დიალოგს“, – განაცხადა სომხეთის პრემიერ მინისტრმა.

მისი თქმით, სომხეთი „ეთანხმება ამ ლოგიკას და აწარმოებს მოლაპარაკებას ამ ლოგიკით, რადგან სტეპანაკერტი-ბაქოს დიალოგის უზრუნველყოფის საერთაშორისო მექანიზმები ძალიან მნიშვნელოვანია.

„ამავე დროს დარწმუნებული ვარ, რომ სომხეთის უსაფრთხოების სტრატეგიულ გარანტიებს წარმოადგენს მშვიდობა, რომელიც შესაძლებელია ყველა მეზობელთან ურთიერთობების რეგულირებით. ეს მარტივი პროცესი არ არის, მაგრამ ვფიქრობ, რომ ეს ის არის, რასაც ჩვენი ხალხი ელოდება“, - აღნიშნა ფაშინიანმა.

შეგახსენებთ, 30 აპრილს ვაშინგტონში გაიმართა მოლაპარაკებები სომხეთსა და აზერბაიჯანს შორის ურთიერთობების ნორმალიაზაციასთან დაკავშირებით, ამის შემდეგ აშშ-ის სახელმწიფო მდივანმა ენტონი ბლინკენმა განაცხადა, რომ მხარეებმა მიაღწიეს მნიშვნელოვან პროგრესს რთული საკითხების მოგვარებაში.

ამის შემდეგ ბრიუსელში შედგა შეხვედრა სომხეთისა და აზერბაიჯანის ლიდერებს შორის ევროკავშირის ჩართულობით.