რუსეთში ტულის ოლქის ეფრემოვის სასამართლომ ალექსეი მოსკალევს, რომლის ქალიშვილმაც სკოლაში ომის საწინააღმდეგო ნახატი დახატა, რუსული არმიის „დისკრედიტაციისათვის“ ორწლიანი პატიმრობა მიესაჯა.

ინფორმაციას რუსეთში „უცხოეთის აგენტად“ გამოცხადებული ინტერნეტ-გამოცემა „მედიაზონა“ ავრცელებს.

მოსკალევი განაჩენის გამოცხადებას არ ესწრებოდა, რადგან სასაამრთლოს პრესმდივნის თქმით, ის ღამით შინაპატიმრობიდან გაიქცა. აღნიშნულ ინფორმაციას დარბაზში აპლოდისმენტები მოჰყვა.

გუშინ პროკურორმა სასამართლო სხდომაზე ბრალდებულისთვის ორწლიანი სასჯელი, სამი წლით ინტერნეტით სარგებლობის აკრძალვა და სახელმწიფოსთვის მოსკალევის კუთვნილი კომპიუტერის გადაცემა მოითხოვა.

ამასთან, მოსკალევს, რომელიც ქალიშვილს მარტო ზრდის, ედავებოდნენ სოციალურ ქსელ „ოდნოკლასნიკში“ ომის შესახებ პოსტების გამოქვეყნებას. მის წინააღმდეგ საქმე გასულ წელს მას შემდეგ აღძრეს, რაც გაზაფხულზე მისმა მეექვსეკლასელმა ქალიშვილმა სკოლაში ომის საწინააღმდეგო ნახატი დახატა. მაშინ მოსკალევს შინაპტიმრობა მიუსაჯეს, გოგონა კი თავშესაფარში გადაიყვანეს.

მოსკალევმა სასამართლო სხდომაზე განაცხადა, რომ კავშირი არ აქვს „ოდნოკლასნიკში“ პოსტების განთავსებასთან, კაცის თქმით, მისი გვერდი გატეხილია.

ამასთან, საბოლოო სიტყვაში მან დაადასტურა, რომ უარყოფითი აზრი აქვს უკრაინაში რუსეთის ომის შესახებ.

„თუ ახლა მკითხავთ აზრს, როგორი დამოკიდებულება მაქვს უკრაინაში „სპეცოპერაციის“ მიმართ, ვფიქრობ, რომ დარბაზში მყოფი ადამიანების 90 პროცენტი იტყვის, რომ ამის წინააღმდეგნი არიან და მე დავეთანხმები მათ. როგორი დამოკიდებულება შეიძლება გვქონდეს ადამიანების დაღუპვის მიმართ? უარყოფითი“, - თქვა მოსკალევმა.