პრემიერ-მინისტრის გიორგი კვირიკაშვილი იმედოვნებს, რომ ვიზალიბერალიზაციის პროცესი დაჩქარებული წესით წარიმართება. 
როგორც პრემიერმა მთავრობის სხდომაზე განაცხადა, ეს არის მნიშვნელოვანი წინ გადადგმული ნაბიჯი და საქართველოსა და ქართველი ხალხის დიდი წარმატება.
„ევროკომისია გამოვიდა საკანონმდებლო ინიციატივით საქართველოს მოქალაქეებისათვის უვიზო რეჟიმის დაწესების თაობაზე. ეს არის მნიშვნელოვანი წინგადადგმული ნაბიჯი და ჩვენი ქვეყნის, ჩვენი ხალხის ძალიან დიდი წარმატება“, - განაცხადა პრემიერმა.
ამასთან, კვირიკაშვილმა ყველას, ვინც ამ პროცესში მნიშვნელოვანი წვლილი შეიტანა, მადლობას უხდის.
„მინდა, დიდი მადლობა გადავუხადო ყველას, ჩვენ მეგობრებს, ჩვენი ქვეყნის ძალიან მნიშვნელოვან პარტნიორებს, ყველას, ვინც უმნიშვნელოვანესი წვლილი შეიტანა ამ პროცესის მართლაც ასე პოზიტიურად წარმართვაში“, - განაცხადა კვირიკაშვილმა.
მისი თქმით, ევროკომისიის მხრიდან ამ ინიციატივას მოჰყვება განხილვა ერთდროულად ორივე ინსტიტუციაში, ევროკავშირის საბჭოსა და ევროპარლამენტში.
„ალბათ, რამდენიმე თვეში, ეს პროცესი წარმატებით დასრულდება. უნდა ვიქონიოთ იმედი, რომ ეს პროცესი ჩქარა წარიმართება. მადლობა მინდა გადავუხადო, ასევე, ევროკომისარს ამ საკანონმდებლო წინადადების ინიცირებისათვის საქართველოს მიერ მიღწეული პროგრესის საფუძველზე და რა თქმა უნდა, ევროკომისიას ნაყოფიერი თანამშრომლობისა და მხარდაჭერისათვის ამ პროცესში და საერთოდ ყველას, ვინც პოზიტიური წვლილი შეიტანა. ასევე, მნიშვნელოვანია, რომ ეს არის ჩვენი ხელისუფლების, როგორც მთავრობის, ასევე, პარლამენტის ძალიან დიდი ძალისხმევისა და ძალიან დიდი შრომის შედეგი და ეს არის, ასევე, ჩვენი მოქალაქეების მხარდაჭერის შედეგი“, - განაცხადა პრემიერმა და მოსახლეობას ვიზალიბერალიზაციის კუთხით გადადგმული მნიშვნელოვანი ნაბიჯები მიულოცა.
ევროკომისიამ გუშინ საქართველოს მოქალაქეებისთვის ვიზის გაუქმების შესახებ საკანონმდებლო წინადადება ევროპარლამენტს ოფიციალურად წარუდგინა. საქართველოს მოქალაქეებს 90 დღის განმავლობაში შეეძლებათ, შენგენის ქვეყნებში უვიზოდ იმოგზაურონ, თუმცა უვიზო მიმოსვლა ევროკავშირის ქვეყნებში სწავლისა და ლეგალური მუშაობის უფლებას არ გულისხმობს. საქართველოს მოქალაქეები, რომლებსაც ბიომეტრიული პასპორტები გააჩნიათ, ევროკავშირის წევრი ქვეყნების ტერიტორიაზე ბიზნესის, ტურიზმის, ტურისტული ან ოჯახური დანიშნულებით შეძლებენ მოგზაურობას.