უკრაინელი სპეცრაზმელები უკრაინის საზღვრებს მიღმა მოქმედებენ და ოპერაციებს რუსეთის ტერიტორიაზე ახორციელებენ. ამის შესახებ The Guardian იუწყება.

გამოცემის ცნობით, ისინი დაუკავშირდნენ სამ უკრაინელ სპეცრაზმელს - 23 წლის ტარასს, 21 წლის ვლადისლავსა და მათ მეთაურს 39 წლის ოლექსის.

აღნიშნულია, რომ სამხედროები უკრაინელი სპეცრაზმელების მოხალისეთა დაჯგუფება, ბატალიონ „ბრატსტვოს“ წევრები არიან, რომლებიც ვლადიმირ პუტინის წინააღმდეგ ბრძოლას რუსეთის სიღრმეში აწარმოებენ.

მათ სამუშაოში შედის კრემლის მაღალჩინოსნების გატაცება, საკვანძო სამხედრო ობიექტების განადგურება და მტრის თვითმფრინავების ჩამოგდება რუსეთის ტერიტორიაზე.

ვლადისლავის თქმით, საჯაროდ ამის შესახებ იმიტომ ყვებიან, რომ პუტინმა და ოკუპანტებმა იცოდნენ, რომ უკრაინელ მებრძოლებს რუსეთის საზღვრის გადაკვეთა მარტივად შეუძლიათ.

„ბრატსტვო“ ირწმუნება, რომ  მნიშვნელოვანია  რუსეთის უმაღლესმა სარდლობამ იგრძნოს ბრძოლის მხურვალება საკუთარ ტერიტორიაზე.

მედია წერს, რომ „ბრატსტვოს“ მოხალისეებს აქვთ განსაკუთრებული სტატუსი, „უკრაინის არმიისგან ტექნიკურად დამოუკიდებლები არიან, მაგრამ მოქმედებენ ოფიციალური პირების მხარდამხარ“.

The Guardian-ი აღნიშნავს, რომ „არაოფიცალური სტატუსის გამო მათი ისტორიის შემოწმება შეუძლებეკია, მაგრამ ისინი დამაჯერებლები არიან და იმსახურებენ ნდობას, ასევე არაჩვეულებრივები არიან გამბედაობით“.

ტარასი ამბობს, რომ ოპერაციიდან ორი კვირის წინ დაბრუნდა. „ჩვენს ჯგუფს რუსეთის ტერიტორიაზე უნდა შეეტანა ასაფეთქებელი ნივთიერებების გარკვეული რაოდენობა და განსაზღვრულ ადგილზე უნდა დაეტოვებინა“.

მისივე თქმით, ექვსი კვირის წინ მან წარმატებული ოპერაცია განახორციელა: „ამოცანა გვქონდა, გაგვენადგურებინა რუსული ვერტმფრენი, რომელსაც რუსეთის შინაგან საქმეთა სამინისტროს მაღალჩინოსნები გადაჰყავდა“.

ოპერაცია პირველივე მცდელობაზე არ დასრულებულა, თუმცა მორიგ ჯერზე მათ ვერტმფრენი გადასატანი საზენიტო-სარაკეტო კომპლექსით 4 კმ-ის მანძილიდან ჩამოაგდეს.

იმის მიუხედავად, დაიღუპნენ თუ არა კრემლის ოფიციალური პირები ვერტმფრენში, ტარასისთვის ეს იყო წარმატებული მისია, რომელმაც მიაღწია თავის მთავარ მიზანს.

ბოლო ოპერაცია რუსეთში, რომელშიც ვლადისლავი მონაწილეობდა „ექვსი თვის წინ იყო ქალაქ ბელგოროდის რაიონში, სადაც ბოლო თვეების განმავლობაში საბრძოლო მასალების რამდენიმე საწყობი აფეთქდა“.

სამხედროები აღნიშნავენ, რომ მათი სამუშაო უკიდურესად სახიფათოა, თმცა ისინი გააზრებულად აცნობიერებენ ამ სამუშაოს მნიშვნელობას.