,,ნაციონალური მოძრაობის" ერთ-ერთი ლიდერის გივი თარგამაძის ინფორმაციით, ერთ-ერთი რუსული ბანკის ფილიალიდან საქართველოს ენერგეტიკის სამინისტროში 1 100 000 დოლარი გადმოირიცხა. დღეს გამართულ პრესკონფერენციაზე თარგამაძემ გადარიცხვის დოკუმენტებიც წარადგინა, სადაც თანხის გადარიცხვის მიზანში მითითებულია მშენებლობა, ხოლო ფულს ვინმე დავით ქარსელაძე რიცხავს. თარგამაძის თქმით, შეთანხმების გარანტორად მითითებულია ვიცე-პრემიერის კახა კალაძის პირადი ბანკი "კალა კაპიტალი". 

გივი თარგამაძემ აღნიშნა, რომ დავით ქარსელაძე ცნობილი კრიმინალია, მეტსახელად "კალატოზა", რომელიც ,,შევარდნაძის დროს ფლობდა და არეკეტებდა სამარშრუტო ტაქსებს, როგორც თბილისში, ასევე უმეტეს რაიონებში“. 
მისივე თქმით, "ვარდების რევოლუციის" შემდეგ, მისი "მოღვაწეობა" აღიკვეთა, მან სასჯელი მოიხადა და შემდეგ გადავიდა საცხოვრებლად რუსეთში.
გივი თარგამაძე კახა კალაძეს რამდენიმე შეკითხვით მიმართავს - კერძოდ, რა მშენებლობაზეა საუბარი, რა შეთანხმებაა კრიმინალთან, ასევე, რა წარმომავლობისაა ეს ფული, რამდენად იღებს აქედან სარგებელს "კალატოზა" და ა.შ.

დეპუტატმა იმედი გამოთქვა, რომ კახა კალაძე აღნიშნულ შეკითხვებს ხვალ პარლამენტში გამართულ საკომიტეტო მოსმენაზე პასუხს გასცემს. 

ენერგეტიკის მინისტრს ხვალ პარლამენტში ელიან.