სომხეთის ხელისუფლებამ, უმაღლეს დონეზე პირველად განაცხადა, რომ ქვეყნის სტრატეგიული მოკავშირე რუსეთი, სომხეთს აიძულებს დერეფანი გაუხსნას აზერბაიჯანს და შეუერთდეს რუსეთ-ბელარუსის სამოკავშირეო სახელმწიფოს, რომლის ფორმირებაც მიმდინარეობს.

ამის შესახებ სომხეთის უსაფრთხოების საბჭოს მდივანმა არმენ გრიგორიანმა სომხეთის საზოგადოებრივი მაუწყებლის ეთერში განაცხადა. მისი თქმით, 13 სექტემბერს სომხეთის სუვერენულ ტერიტორიაზე აზერბაიჯანის შეჭრა, ასევე ლაჩინის კოროდორის ჩაკეტვა, რომელიც მთიან ყარაბაღს სომხეთთან აკავშირებს, სომხეთზე რუსეთის მხრიდან ზეწოლის ჩარჩოებში ჯდება. გრიგორიანის თქმით, სწორედ ამაში მდგომარეობს სომხეთ-რუსეთის კრიზისის მიზეზი, რომელიც ბოლო დროს აშკარად გამოიკვეთა.

 „სომხეთი წინააღდეგობას აგრძელებს. ამასთან, მინდა მკაფიოდ ვთქვა, რომ ამას უკავშირდება 13 სექსტებრის ესკალაცია, და ძირითადად ეს წარმოადგენს მთელი კრიზისის საფუძველს ან მოტივს“, - განაცხადა გრიგორიანმა.

შეკითხვაზე, ეს ყველაფერი დერეფნის გამო ხომ არ ხდება, სომხეთის უსაფრთხოების საბჭოს მდივანმა უპასუხა: „მათ შორის ამის გამოც. სხვაგვარად რომ ვთქვათ, ექსტერიტორიული დერეფნის გამო, რომელმაც სომხეთის ტერიტორიაზე უნდა გაიაროს“.