რუსეთის ხელისუფლებამ სარატოვის ოლქში, ენგელსის ავიაბაზაზე აფეთქების შედეგად სამი რუსი ჯარისკაცის დაღუპვა დაადასტურა. ოლქის გუბერნატორის, რომან ბუსარგინის თქმით, მოსახლეობას საფრთხე არ ემუქრება.

 „მოსახლეობას საფრთხე არ ემუქრება, ქალაქიდან ევაკუაციის შესახებ ინფორაცია თავხედური სიცრუეა, რომელიც ქვეყნის ფარგლებს გარეთ შეითხზა. სამოქალაქო ინფრასტრუქტურის ობიექტები არ დაზარალებულა. სამხედრო ობიეტქზე მომხდარის შესახებ ცნობებს ძალოვანი სტრუქტურები ამოწმებენ“, - განაცხადა ბუსარგინმა.

ამავე დროს, გამოცემა Baza იუწყება, რომ ენგელსის ავიაბაზაზე აფეთქების შემდეგ გაჩენილი ხანძრის ფართობმა120 კვადრატული მეტრი შეადგინა.

წინასწარი მონაცემებით, დაიღუპა 3 ადამიანი, ოთხი კი დაშავდა.

რუსეთის თავდაცვის სამინისტროს ცნობით, საჰაერო თავდცვამ უკრანიული უპილოტო საფრენი აპარატი ჩამოაგდო.

მანამდე რუსეთის ქალაქ ენგელსში აეროდრომის რაიონში საჰაერო განგაში გამოცხადდა. ისმოდა აფეთქებების ხმა.