ევროპარლამენტმა საქართველოსთან ასოცირების ხელშეკრულების შესრულების შესახებ ყოველწლიური ანგარიში მიიღო, რომელშიც, რეკომენდაციის სახით, რამდენიმე შესწორება შევიდა.

კერძოდ, ერთ-ერთ შესწორებაში აღნიშნულია, რომ „ევროპარლამენტი ხაზს უსვამს ეკონომიკურ, პოლიტიკურ და საზოგადოებრივ ცხოვრებაში პირადი ინტერესების გადაჭარბებული გავლენის აღმოფხვრის აუცილებლობას, როგორც კომისიის მიერ განსაზღვრულ ერთ-ერთ პრიორიტეტს, რომელიც უნდა განიხილებოდეს საქართველოსთვის კანდიდატის სტატუსის მინიჭებამდე“.

დღეს მიღებულ ანგარიშში აღნიშნულია, რომ ევროპარლამენტი: „რეკომენდაციას უწევს პირადი ინტერესების, განსაკუთრებით, ოლიგარქისა და ყოფილი პრემიერის, ბიძინა ივანიშვილის გადაჭარბებული გავლენის აღმოფხვრას სისტემურად სტრუქტურული და მარეგულირებელი რეფორმების მეშვეობით, ქვეყნის პოლიტიკური, ეკონომიკური და საზოგადოებრივი ცხოვრების სხვადასხვა სფეროში.

ევროკავშირთან საქართველოს ასოცირების შეთანხმების შესრულების შესახებ ყოველწლიური რეზოლუციაში ევროპარლამენტარები კვლავ მოუწოდებენ საქართველოს ხელისუფლებას, გაათავისუფლოს ყოფილი პრეზიდენტი მიხეილ სააკაშვილი და შესაძლებელი გახადონ მისი სათანადო მკურნალობა საზღვარგარეთ ჰუმანიტარულ საფუძველზე, როგორც პოლიტიკური პოლარიზაციის შემცირების საშუალება.

პლენარულ სხდომაზე განხილულ შესწორებებში ნათქვამია, რომ ევროპარლამენტი გამოხატავს შეშფოთებას მიხეილ სააკაშვილის ჯანმრთელობის მდგომარეობის სწრაფ გაუარესებაზე და მასზე პასუხისმგებლობა მთავრობას ეკისრება.

"ევროპარლამენტი გამოხატავს სერიოზულ შეშფოთებას დოქტორი დევიდ სმიტის ტოქსიკოლოგიურ ანგარიშთან დაკავშირებით, რომელიც დაასკვნა, რომ მიხეილ სააკაშვილის მიერ გამოვლენილი მრავალი პათოლოგიური სიმპტომი მძიმე ლითონის მოწამვლის შედეგია, რაც ხელს უწყობს მის ჯანმრთელობის სწრაფად დაქვეითებას; იმეორებს, რომ საქართველოს მთავრობას ეკისრება სრულ პასუხისმგებლობას ყოფილი პრეზიდენტის ჯანმრთელობასა და კეთილდღეობაზე და უნდა აგოს პასუხი, თუ მას რაიმე დაემართება". – ნათქვამია დოკუმენტში.

შესწორებებში გაჩნდა პრეზიდენტი სალომე ზურაბიშვილის სახელიც, რომელსაც სთხოვენ, გამოიყენოს კონსტიტუციით მინიჭებული უფლებამოსილება მიხეილ სააკაშვილისა და მთავარი არხის დირექტორის, ნიკა გვარამიას შესაწყალებლად.

"რეზოლუცია იწვევს საქართველოს პრეზიდენტს, გამოიყენოს მისი კონსტიტუციური უფლებები ამ საკითხის გადასაჭრელად; მოუწოდებს კომისიის ვიცეპრეზიდენტს/უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში [ჯოზეფ ბორელს], აქტიურად ჩაერთოს ყოფილი პრეზიდენტის გათავისუფლების უზრუნველყოფის პროცესში; კვლავ მოუწოდებს საქართველოს ხელისუფლებას, გაათავისუფლოს ყოფილი პრეზიდენტი მიხეილ სააკაშვილი და მიეცეს მას სათანადო მკურნალობის საშუალება საზღვარგარეთ, საქართველოს სისხლის სამართლის საპროცესო კოდექსის 283-ე მუხლის შესაბამისად, ჰუმანიტარული მიზნით, როგორც პოლიტიკური პოლარიზაციის შემცირების საშუალება", – ნათქვამია შესწორებაში.