ირანში სიკვდილით დასაჯეს საპროტესტო აქციების კიდევ ერთი მონაწილე. მედიის ცნობით, ორშაბათს, 12 დეკემბერს, ქალაქ მეშჰედში მაჯიდრეზა რაჰნავარდი სახალხოდ ჩამოახრჩვეს.

თეირანში ამბობენ, რომ  ნეომბერში საპროტეტსო აქციების დროს მაჯიდრეზამ დაჭრა გასამხედროებული ფორმირება „ბასიჯის“ ორი წევრი, რომელიც ისლამური რევოლუციის გუშაგთა კორპუსს ექვემდებარება. სასამართლომ დემონსტრანტი დამნაშავედ ცნო „ღმერთის მტრობაში“ და 29 ნოემბერს სასიკვდილო განაჩენი გამოუტანა.

მანამდე, 8 დეკემბერს, გავრცელდა ინფორმაცია მასობრივი პროტესტების კიდევ ერთი მონაწილის სიკვდილით დასჯის შესახებ. გავრცელებული ცნობებით, 23 წლის რეპერი მოჰსენ შეკარი ჩამოახრჩვეს. ირანის სასამართლომ ახალგაზრდა კაცი დამნაშავედ ცნო „ღმერთის მტრობაში“. ის დამნაშავედ აღიარეს 25 სექტემბერს თეირანში სათარ ხანის ბულვარის ბლოკირებასა და „ბასიჯის“ წევრის დაჭრაში.

გერმანიის საგარეო საქმეთა მინისტრმა ანალენა ბერბოკმა სიკვდილით დასჯას წარმოუდგენელი დანაშაული უწოდა და განაცხადა, რომ პასუხისმგებელ პირებს სანქციები დაეკისრებათ, რომელსაც 12 დეკემბერს, ევროკავშირის ქვეყნების საგარეო საქმეთა მინისტრების შეხვედრაზე მიიღებენ.

ირანში საპროტესტო აქციები სექტემბერში დაიწყო. მოსახლეობის პროტესტი 22 წლის მაჰსა ამინის გარდაცვალებას მოჰყვა, რომელიც „მორალის პოლიციამ“ 13 სექტემბერს ჰიჯაბის არასწორი გამოყენების გამო დააკავა. დაკავების შემდეგ გოგონა კომაში ჩავარდა. იმავე დღეს ის საავადმყოფოში გადაიყვანეს, სადაც ორი დღის შემდეგ შინაგანი დაზიანებების შედეგად გარდაიცვალა.

პროტესტი 17 სექტემბერს ქურთების ქალაქ საკეზში ქალის დაკრძალვაზე დაიწყო.

უფლებადამცველები ამბობენ, რომ საპროტესტო აქციების დარბევების შედეგად 200-ზე მეტი ადამიანი დაიღუპა, მათ შორის არასრუწლოვნებიც.