ყატარში მსოფლიოს ჩემპიონატზე, დოჰას არენაზე, ინგლისისა და ირანის ნაკრებების მატჩზე ირანელმა ფეხბურთელებმა თავიანთი ქვეყნის ჰიმნი არ იმღერეს, ქალებს სოლიდარობა გამოუცხადეს და თეირანის ხელისუფლების მხრიდან საპროტესტო აქციების მონაწილეთა დევნა გააპროტესტეს.

ტრიბუნებზე მყოფი ირანელი გულშემატკივრები კი ჰიმნს სტვენით შეხვდნენ.

ირანელი ფეხბურთელებისა და გულშემატკივრების პროტესტი, სავარაუდოდ, სწორედ ქვეყნის პოლიტიკური რეჟიმის წინააღმდეგ იყო მიმართული, რომელიც ქალთა უფლებებს არ იცავს.

ირანში საპროტესტო აქციები სექტემბრიდან მიმდინარეობს. მოსახლეობის პროტესტი 22 წლის მაჰსა ამინის გარდაცვალების შემდეგ დაიწყო, რომელიც „მორალის პოლიციამ“ 13 სექტემბერს ჰიჯაბის არასწორი გამოყენების გამო დააკავა. დაკავების შემდეგ გოგონა კომაში ჩავარდა. იმავე დღეს ის საავადმყოფოში გადაიყვანეს, სადაც ორი დღის შემდეგ შინაგანი დაზიანებების შედეგად გარდაიცვალა.

პროტესტი 17 სექტემბერს ქურთების ქალაქ საკეზში ქალის დაკრძალვაზე დაიწყო.

უფლებადამცველები ამბობენ, რომ საპროტესტო აქციების დარბევების შედეგად 200-ზე მეტი ადამიანი დაიღუპა, მათ შორის არასრუწლოვნებიც.