ბრიტანეთის პრემიერ-მინისტრმა რიში სუნაკმა კიევში თავისი პირველი ვიზიტის დროს დაადასტურა, რომ დიდ ბრიტანეთი გააძლიერებს უკრაინის საჰაერო თავდაცვას. იუწყება უკრაინული მედია.

სუნაკი უკრაინის პრეზიდენტს, ვოლოდიმირ ზელენსკის შეხვდა და მიმდინარე ომის მოვლენები განიხილა.

„იმ დროს, როცა უკრაინის შეიარაღებული ძალები წარმატებით ებრძვიან რუსულ ჯარს ხელეთზე, მშვიდობიანი მოსახლეობა ჰაერიდან სასტიკი დარტყმების ქვეშ ხვდება“, - განაცხადა სუნაკმა.

50 მლნ ფუნტი სტრელინგის ღირებულების საჰაერო თავდაცვის ძირითადი პაკეტი მიმართული იქნება „უკრაინის მოსახლეობისა და კრიტიკულად მნიშვნელოვანი ეროვნული ინფრასტრუქტურის დასაცავად რუსეთის ინტენსიური დარტყმებისგან დასაცავად“.

დახმარების პაკეტი მოიცავს 125 საზენიტო იარაღსა და ტექნოლოგიებს ირანული დრონების წინააღმდეგ საბრძოლველად, მათ შორის  საუბარია ათეულობით რადარსა და ელექტრონულ საბრძოლო საშუალებებზე უპილოტო საფრენი აპარატების წინააღმდეგ.

დიდი ბრიტანეთი ასევე გააგრძელებს შეთვაზებებს უკრაინის შეიარაღებული ძალების სწავლებისთვის, რეგიონში გაგზავნის გამოცდილ სამხედრო მედიკოსებსა და ინჟინრებს.

„ვამაყობ, რომ დიდი ბრიტანეთი პირველივე დღეებიდან მხარს უჭერდა უკრაინას და მე აქ ვარ იმისთვის, რომ ვთქვა - დიდი ბრიტანეთი და ჩვენი მოკავშირეები გააგრძელებენ უკრაინის დახმარებას, რომელიც იბრძვის ამ ბარბაროსული ომის დასასრულებლად და სამართლიანი მშვიდობის დასამყარებლად“, - განაცხადა სუნაკმა

„ჩემთვის დიდი პატივია დღეს კიევში ყოფნა და შესაძლებლობა შევხვდე მათ, ვინც ყველაფერს აკეთებს და იხდის დიდ ფასს, სუვერენიტეტისა და დემოკრატიის პრინციპების დასაცავად“, - აღნიშნა სუნაკმა.