ომის დაწყებიდან უკრაინაში 437 ბავშვი დაიღუპა, 1 274-ზე მეტი დაშავდა. ამის შესახებ ინფორმაციას უკრაინის გენერალური პროკურატურა ავრცელებს.

ყველაზე მეტად ბავშვები დაზარალდნენ დონეცკის, ხარკივის, კიევის, მიკოლაევის, ზაპოროჟიეს, ჩერნიჰივის, ლუჰანსკის, ხერსონისა და დნიპროპეტროვსკის ოლქებში.

პროკურატურაში აცხადებენ, რომ აღნიშნული მონაცემები საბოლოო არ არის, საუბარია მხოლოდ იმ ბავშვებზე, რომელთა ვინაობის დადგენაც მოხერხდა. უკრაინის რეგიონებში, სადაც საომარი მოქმედებები გრძელდება და ოკუპირებულ ტერიტორიებზე, სრული სურათის დადგენა შეუძლებელია.

დაბომბვების შედეგად დაზიანდა 2 719-ზე მეტი სასწავლო დაწესებულება, 332 კი სრულად დაინგრა.

გაეროს 14 ნოემბრის მონაცემებით, რუსეთის აგრესიის შედეგად დაიღუპა 6 557 მშვიდობიანი მოქალაქე, მათ შორის 408 ბავშვი.

გაეროში ასევე აღნიშნავენ, რომ დაღუპულებისა და დაშავებულების რაოდენობა გაცილებით მეტია და ომის მსხვერპლთა შესახებ მოცემული რიცხვები მხოლოდ დოკუმენტურად აღნუსხული და დამტკიცებული მონაცემებია.