უკრაინის პრეზიდენტის ვოლოდმირ ზელენსკის განცხადებით, 17 ნოემბრის საღამოს მდგომარეობით, 10 მლნ უკრაინელი ელექტროენერგიის გარეშე დარჩა. ამის შესახებ ზელენსკიმ ვიდეომიმართვისას ისაუბრა.

 „მთელი დღის განმავლობაში მიმდინარეობდა უკრაინის წინააღმდეგ მორიგი სარაკეტო იერიშის შედეგების ლიკვიდაცია. სინათლე კვლავ ავარიულად გამოირთო. ყველაფერს ვაკეთებთ ელექტრომომარაგების აღსადგენად“, - განაცხადა ზელენსკიმ.

მისი მონაცემებით, ყველაზე რთული ვითარებაა ვინიცაში, ოდესის, სუმის ოლქებსა და კიევში.

 „დნიპროში სარაკეტო დარტყმის შედეგად ათობით ადამიანი დაიჭრა. ზაპოროჟიეში გრძელდება საცხოვრებელი სახლის ნანგრვეების გაწმენდა, რომელიც რუსეთის დაბომბვის შედეგად წინა ღამეს განადგურდა. სავარაუდოდ, დაღუპულია შვიდი ადამიანი, სამწუხაროდ, ეს რიცხვი, შესაძლოა, გაიზარდოს“, - თქვა უკრაინის პრეზიდენტმა.

მან კვლავ მიმართა დასავლეთის ქვეყნებს თხოვნით, დაიცვან უკრაინა რუსეთის სარაკეტო დარტყმებისგან. „ისევ და ისევ ვუმეორებთ ჩვენს პარტნიორებს, რომ მხოლოდ უკრაინის ცის სრულად დაცვა უზრუნველყოფს უკრაინისა და ევროპის უსაფრთხოებას რუსული აგრესიის ესკალაციისგან და  რუსეთს ომის შეწყვეტას აიძულებს“, - განაცხადა ზელენსკიმ.