თალიბების ლიდერმა ჰაიბათულა აჰუნძადამ ავღანეთის მოსამართლეებს უბრძანა შემოიღონ სასჯელი შარიათის კანონების შესაბამისად. მისი მოთხოვნით,  ძარცვაში, ადამიანების გატაცებასა და ამბოხისკენ წაქეზებაში ბრალდებულები  საჯაროდ უნდა დაისაჯონ კიდურების მოკვეთითა და ჩაქოლვით. იუწყება BBC.

თალიბების პრეს-მდივანმა ზაბუჰულა მუჯაჰიდმა „ტვიტერში“ დაწერა, რომ მოსამრთლეებს მიეცათ დავალება გამოავლინონ დანაშაულის ელემენტებში წმინდა ისლამური კანონების დარღვევის ნიშნები. ეს განსაკუთრებით ეხებათ ქურდებს, გამტაცებლებსა და მემბოხეებს.

არსებითად, თალიბებს ახალი არაფერი შემოაქვთ, მხოლოდ უბრუნდებიან ძველ პრაქტიკას, რომელიც 1996-2001 წლებში ხელისუფლებაში მოსვლის შემდეგ დაამკვიდრეს. იმ წლებშივე მათ შემოიღეს საჯაროდ, სისასტიკით სიკვდილით დასჯა.

სწორედ ამის გამო მათ ზურგი შეაქცია  ბევრმა ავღანელმა, რომელბიც საერთო ჯამში ყოველთვის შარიათის კანონებს ემხრობოდნენ.

გასული წლის აგვისტოში ავღანეთიდან ნატო-ს ძალების გასვლისა და ხელისუფლებში დაბრუნების შემდეგ,   თალიბებმა ზომიერი მმართველობის პირობა დადეს. მაგრამ ამის მიუხედავად, სასტიკად ახშობენ თავისუფლების ნებისმიერ გამოვლინებას, განსაკუთრებით კი ქალთა უფლებებს.

გასულ კვირას მათ ქალებს ქაბულის პარკებში შესვლა აუკრძალეს, რაც საზოგადოებრივი ცხოვრებისგან ქალების უფრო მეტ იზოლაციას გამოიწვევს.

ასევე დედაქალაქის მაცხოვრებელ ქალებს გასული კვირიდან ეკრძალებათ საზოგადოებრივ აბანოებსა და სპორტულ დარბაზებში შესვლა, იმის მიუხედავად, რომ ამ დაწესებულებებში შესასვლელი გენდერული ნიშნით გაყოფილია.

ამიერიდან, ავღანელი ქალებისთვის ეს ადგილები სრულად მიუწვდომელია. სრულ აკრძალვას თალიბები იმით ხსნიან, რომ ქალების ყოფნა მსგავს ადგილებში ისლამის კანონებს არ შეესაბამება.

ქალებს ეკრძალებათ შორეული მოგზაურობა მამაკაცის თანხლების გარეშე.

მოზარდ გოგონებს ქვეყნის უმეტეს ნაწილში სკოლებში სწავლა ისევ აკრძალული აქვთ, „თალიბანის“ დაპირების მიუხედავად, რომ მათ განათლების უფლებას მისცემდა.

მხოლოდ მცირე რაოდენობით ქალი აგრძელებს მუშაობას ისეთ სფეროებში, როგორიცაა ჯანდაცვა და განათლება. უმეტესობა, თალიბანის ხელისუფლებაში მოსვლის შემდეგ, სამსახურში აღარ დაბრუნებულა.

თალიბებმა მაისში გამოსცეს განკარგულება, რომლის თანახმად, ავღანელ ქალებს ეკრძალებათ ქუჩაში დაუფარავი სახით გამოსვლა.

ქაბულში ქალები რამდენჯერმე გამოვიდნენ საპროტესტო აქციებზე თავიანთი უფლებების დასაცავად, თუმცა „თალიბანი“ ბევრ მათგანს სასტიკად გაუსწორდა.

ავღანეთში სასტიკი ანგარიშსწორების ქვეშ ასევე ექცევიან ოპოზიციის წარმომადგენლები, ჟურნალისტები, დასავლურ ორგანიზაციების ყოფილი თანამშრომლები და თარჯიმნები, რომლებიც ნატო-ს ჯარებთან თანმშრომლობდნენ.

საზღვარგარეთ გაყინულია მილიარდობით დოლარი ავღანური აქტივებიდან. საერთაშორისო საზოგადოება „თალიბანს“ ავღანეთში უსაფრთხოებისა და ადამიანის უფლებების დაცვის სფეროში დაპირებების შესრულებას სთხოვს.