უკრინის მიმართულებით დღეს გასროლილი ერთ-ერთი რუსული რაკეტა მოლდოვის დასახლებული პუნქტის ტერიტორიაზე დაეცა. ინფორმაციას მოლოდვის შინაგან საქმეთა სამინისტრო ავრცელებს.

„დღეს, დილით რაკტა, რომელიც უკრაინის საჰაერო თავდაცვამ ჩამოაგდო, მოლდოვის რეპუბლიკაში, ნასლავჩის დასახლებული პუნქტის ჩრდილოეთ ნაწილში დაეცა, რომელიც უკრაინის საზღვართან მდებარეობს“, - ნათქვამია ინფორმაციაში.

შედეგად რამდენიმე საცხოვრებელ სახლში ჩიამსხვრა ფანჯრები. დაშავებულები არ არიან. ადგილზე საგამოძიებო სამსახურების წარმომადგენლები მუშაობენ.

31 ოქტომბერს, დილიდან რუსეთის ძალებმა უკრაინის წინააღმდეგ სარაკეტო იერიში განახორციელა.

კიევში ათამდე აფეთქების ხმა გაისმა. მათი ნაწილი დედაქალაქის შემოგარენიდან ისმოდა.

რუსეთმა სარაკეტო დარტყმა კიევის კრიტიკულ ინფრასტრუქტურაზე მიიტანა. შედეგად, უკრაინის დედაქალაქის რამდენიმე რაიონს წყალი და დენი შეზღუდულად მიეწოდება.

აფეთქებები იყო ასევე ვინიცის, პოლტავის, კიროვოგრადისა და ოდესის ოლქებშიც.

უკრაინული მედიის ცნობით, ვინიცის ოლქში ერთ-ერთი ჩამოგდებული რაკეტა სამოქალაქო ობიექტებს დაეცა. დაშავებულებისა და დაღუპულების შესახებ ინფორმაცია ჯერ არ ვრცელდება.

31 ოქტომბრის დილიდან მთელი უკრაინის მასშტაბით საჰაერო თავდასხმის გამაფრთხილებელი სიგნალი იყო ჩართული.