უკრაინის სახელმწიფოებრიობისა და სუვერენიტეტის ერთადერთი, ნამდვილი და სერიოზული გარანტორი შეიძლება იყოს მხოლოდ რუსეთი, - ამის შესახებ რუსეთის პრეზიდენტმა ვლადიმირ პუტინმა „ვალდაის“ ფორუმზე სიტყვით გამოსვლისას განაცხადა.

მისი თქმით, რუსი და უკრაინელი ხალხების ერთიანობა ისტორიული ფაქტია.

„ჩვენი სახელმწიფოებრიობა ერთდროულად იქმნებოდა. ენაში ცვლილებები უკვე პოლონეთის გავლენის ქვეშ მოხდა. იმ ნაწილში, რომელიც პოლონეთის გავლენის ქვეშ მოხვდა - იქ პოლონიზაცია მოხდა“, - თქვა პუტინმა.

მისი თქმით, რუსი ერის გაყოფა ჯერ კიდევ მე-19 საუკუნეში დაიწყო, რასაც მუდმივად მხარს უჭერდა დასავლეთი. მოგვიანებით, ამისგან წარმოიშვა მთელი კულტი, რომელიც დაფუძნებული იყო პრინციპზე „დაყავი და იბატონე“.

მისივე თქმით, დროთა განმავლობაში ამ ტენდენციამ გამოიწვია ჰიტლერთან თანამშრომლობა, რომელიც ყველაზე ბინძურ დავალებებს ბანდერელებსაძლევდა. თუმცა, ის, რომ „ჩვენ ერთი ხალხი ვართ - ეს ისტორიული ფაქტია“, - დასძინა პუტინმა.

პუტინის თქმით, უკრაინის სახელმწიფოებრიობისა და სუვერენიტეტის ერთადერთი და სერიოზული გარანტორი შეიძლება იყოს მხოლოდ რუსეთი.

„სტალინმა აიღო და გადასცა უკრაინას რიგი პოლონური, უნგრული და რიგი რუმინული ტერიტორიები ამ ქვეყნებიდან მათი ტერიტორიების წაღების შემდეგ. პოლონელებს, რომლებიც არ მონაწილეობდნენ ჰიტლერის კოალიციაში, აღმოსავლეთ გერმანული მიწის ნაწილი. ეს ისტორიული ფაქტია და ამგვარად შეიქმნა დღევანდელი უკრაინა. ღიად ვამბობ, რომ უკრაინის სახელმწიფოებრიობის და სუვერენიტეტის ერთადერთი, ნამდვილი და სერიოზული გარანტორი შეიძლება იყოს მხოლოდ რუსეთი, რომელმაც შექმნა დღევანდელი უკრაინა“, – აღნიშნა ვლადიმირ პუტინმა.