აშშ-ს, დიდი ბრიტანეთისა და საფრანგეთის მთავრობებმა რუსეთის თავდაცვის მინისტრის, სერგეი შოიგუს ბრალდებაზე, რომ უკრაინის მხრიდან "ბინძური ბომბის" გამოყენების საფრთხე არსებობს, ერთობლივი განცხადება გაავრცელეს.

განცხადებაში დასავლური ქვეყნების მთავრობებმა შოიგუს ბრალდებას, უკრაინის მიერ საკუთარ ტერიტორიაზე "ბინძური ბომბის" გამოყენებასთან დაკავშირებით, "ცხადი სიცრუე" უწოდეს.

აშშ-ის, ბრიტანეთისა და საფრანგეთის საგარეო უწყებების ხელმძღვანელების ერთობლივი განცხადება ამერიკის სახელმწიფო დეპარატამენტის ოფიციალურ ვებგვერდზე გამოქვეყნდა.

 „ჩვენი ქვეყნების თავდაცვის უწყებების ხელმძღვანელები რუსეთის თავდაცვის მინისტრს, სერეგი შოიგუს მისი თხოვნით ესაუბრნენ. ჩვენმა ქვეყნებმა მკაფიოდ განმარტეს, რომ რუსეთის მტკიცება ცხადი სიცრუეა, რომ უკრაინა თავის ტერიტორიაზე ბინძური ბომბის გამოყენებისთვის ემზადება. ამ მტკიცებულების ნებისმიერი გამოყენების მცდელობას მსოფლიო ესკალაციის საბაბად შეაფასებს“, - ნათქვამია ინფორმაციაში.

რუსეთის თავდაცვის მინისტრმა სერგეი შოიგუმ 23 ოქტომბერს სატელეფონო საუბარი გამართა ნატოს სამი ქვეყნის თავდაცვის უწყებების ხელმძღვანელებთან. რუსეთის თავდაცვის სამინისტროს ცნობით, შოიგუმ სამივე კოლეგასთან გამოთქვა შეშფოთება უკრაინის მიერ ე.წ. „ბინძური ბომბის“ შესაძლო გამოყენებასთან დაკავშირებით.

სატელეფონო საუბრებს წინ უძღოდა სახელმწიფო სააგენტო „რია ნოვოსტის“ მიერ გავრცელებული ინფორმაცია, რომ "კიევის რეჟიმი ამზადებს პროვოკაციას "ბინძური ბომბის" გამოყენებით.

ინფორმაციაში ნათქვამია, რომ უკრაინის ხელისუფლება, სავარაუდოდ, "ამზადებს პროვოკაციას თავისი ქვეყნის ტერიტორიაზე ე.წ. "ბინძური ბომბის" ან დაბალი წარმადობის ბირთვული იარაღის აფეთქებასთან დაკავშირებით", რომლის მიზანი, რუსული სააგენტოს მტკიცებით, რუსეთის დადანაშაულებაა მასობრივი განადგურების იარაღის გამოყენებაში.