რუსი ოკუპანტები დროებით ოკუპირებულ ხერსონს ქუჩის ბრძოლებისთვის ამზადებენ.

ამის შესახებ ინფორმაციას უკრაინის შეიარაღებული ძალების გენშტაბი ავრცელებს.

„არსებული ინფორმაციით, ხერსონი მოსახლეობის მნიშვნელოვანმა ნაწილმა დატოვა. ქალაქში დარჩენილი სამოქალაქო ფორმებში გადაცმული რუსი ოკუპანტები სახლდებიან მიტოვებულ შენობებში. მტერი ხერსონს ქუჩის ბრძოლებისთვის ამზადებს“, - აღნიშნავენ გენშტაბში.

გარდა ამისა, ინფორმაციის თანახმად, 21 ოქტომბრის მონაცემებით, რუსი ოკუპანტები ატარებენ ზომებს კახოვკის საავადმყოფოების პაციენტებისა და სამედიცინო პერსონალის გასათავისუფლებლად.

შეგახსენებთ, აგვისტოს ბოლოს სხვადასხვა მიმართულებით უკრაინის შეიარაღებული ძალების კონტრშეტევა დაიწყო. უკრაინის არმიამ წინ წაიწია ხერსონის ოლქში. 21 ოქტომბრის მონაცემებით, რეგიონში დეოკუპირებულია 88 დასახლებული პუნქტი.

ამერიკის ომის შემსაწავლელი ინსტიტუტის (ISW) ანალიტიკოსები მიიჩნევენ, რომ რუსეთის ხელისუფლება, სავარაუდოდ, ცდილობს საინფორმაციო ველის შექმნას იმისათვის, რომ გაამართლოს თავისი ჯარების უკან დახევა და ხერსონის ოლქის დიდი ნაწილის დატოვება.

უკრაინის სამხრეთში უკრაინული ძალები აქტიურად ანადგურებენ მტერს და მის მნიშვნელოვან ობიექტებს, ტექნიკასა და შეიარაღებას.

22 ოქტომბერს ცნობილი გახდა, რომ სამხრეთში უკრაინის შეიარაღებულმა ძალებმა გაანადგურეს 17 ოკუპანტი, ზალპური ცეცხლის რეაქტიული სისტემა „გრადი“ და საბრძოლო მასალის სამი საწყობი.

გენშტაბში აცხადებენ, რომ 22 ოქტომბრის მონაცემებით, საერთო ჯამში უკრაინაში უკვე ლიკვიდირებულია 67 070 რუსი ოკუპანტი.