უკრაინის პრეზიდენტის ოფისის ხელმძღვანელი ანდრეი ერმაკი ამბობს, რომ რუსეთის საოკუპაციო რეჟიმი ცდილობს ხერსონის მოსახლეობის დაშინებას ყალბი ცნობებით ქალაქის „დაბომბვის“ შესახებ და აწყობს პროპაგანდისტულ წარმოდგენას ევაკუაციასთან დაკავშირებით.

მან აღნიშნულს პრიმიტიული ტაქტიკა უწოდა და განაცხადა, რომ უკრაინის შეიარაღებული ძალები უკრაინის ქალაქებს არ ბომბავენ.

ხერსონის საოკუპაციო ადმინისტრაციამ ოლქის მოსახლეობის მდინარე დნეპრის მარცხენა სანაპიროზე "ორგანიზებული გადაადგილება" დაიწყო. ინფორმაცია ამის შესახებ ქალაქი ოლშკის საოკუპაციო ადმინისტრაციამ გაავრცელა.

"ხერსონში დაიწყო მოსახლეობის ორგანიზებული გადაადგილება დნეპრის მეორე სანაპიროზე. ამისთვის ამოქმედებულია ბორნები, რომლებსაც ხალხი ხერსონიდან ალიოშკასა (ოლეშკი) და გოლაია პრისტანში (გოლა-პრისტანი) გადაჰყავთ. აქვე განათავსებენ დროებითი განსახლების პუნქტს, სადაც უკვე მაშველები გაანაწილებენ მგზავრობის მიმართულებას, რომელსაც თავად ადამიანის სურვილის მიხედვით აირჩევენ". – წერს ქალაქი ოლეშკის  მარიონეტული ადმინისტრაცია ტელეგრამ-არხზე.

18 ოქტომბერს ხერსონის ოქლის საოკუპაციო ადმინისტრაციის ხემძღვანელმა ვალდიმირ სალდომ განაცხადა, რომ მარჯვენადან მარცხენა სანაპიროზე 50-60 ათასი ადამიანის გადაყვანა იგეგმება. სალდოს განმარტებით, გადაწყვეტილება გამოწვეულია კახოვკას ჰიდროელექტროსადგურის კაშხლის უკრაინის შეიარაღებული ძალების მიერ დაზიანებისა და რეგიონის დატბორვის საფრთხით.

ამასთან, უკრაინაში რუსეთის ჯარების სარდალმა, გენერალმა სერგეი სუროვიკინმა ხერსონის მიმართულებაზე სიტუაციას დაძაბული უწოდა. მისივე განცხადებით, ხერსონთან მიმართებით რუსეთის შემდგომი გეგმები დამოკიდებული იქნება სამხედრო-ტაქტიკურ სიტუაციაზე. ამასთან მან აღნიშნა, რომ არ გამორიცხავს რთული გადაწყვეტილებების მიღებას.