ვაკის პარკის ჩადრევანში ჩავარდნილი გოგონა, რომელსაც დენმა დაარტყა, დაიღუპა. ინფორმაცია ხეჩანიშვილის კლინიკაში დაადასტურეს. 

ექიმის თქმით, 13 წლის გოგონა კლინიკაში გულის გაჩერებით შეიყვანეს და მისი გადარჩენა ვერ მოხერხდა.

„კლინიკაში შემოიყვანეს ორი ბავშვი, 13 წლის. მოხდა ერთი პაციენტის სტაბილიზაცია მართვის სუნთქვაზე გადაყვანით. დასტაბილურების შემდეგ, გადაყვანილია პედიატრიულ კლინიკაში. რაც შეეხება 13 წლის გოგონას, ის შემოიყვანეს გულის გაჩერებით და რეანიმაციული ღონისძიებები უშედეგო აღმოჩნდა, დაფიქსირდა ბიოლოგიური სიკვდილი“, – განაცხადა ექიმმა.

შემთხვევა დღეს, 13 ოქტომბერს მოხდა - ბავშვები თამაშისას ახლადგახსნილი პარკის შადრევანში ჩავიდნენ, რა დროსაც მათ დენმა დაარტყა.  

თვითმხილველების თქმითვე, თავდაპირვლად შადრევანში ერთი ბავშვი ჩავიდა, შემდეგ კი ორი თანაკლასელი. სამივე მათგანი სასწრაფო დახმარების ბრიგადამ სამედიცინო დაწესებულებაში გადაიყვანა.

შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოების დროს უსაფრთხოების წესების დარღვევას გულისხმობს.  

მერიის ცნობით, მცირე კასკადისა და მრგვალი შადრევნის სარეაბილიტაციო სამუშაოების ღირებულება 6 500 000 ლარია. ჯამში, ვაკის პარკის განახლების პროექტი, გამწვანებისა და ინფრასტრუქტურული სამუშაობის ჩათვლით, 33 000 000 ლარს შეადგენს.