უკრაინის თავდაცვის მინისტრმა ოლექსეი რეზნიკოვმა რუს სამხედროებს მიმართა და მოუწოდა დრო არ დაკარგონ და რუსეთი ტრაგედიისგან იხსნან, რუსეთის არმია კი - დამცირებისგან. მან განაცხადა, რომ რუსეთის ხელძღვანელობამ ისინი მოატყუა და გაყიდა, როდესაც ვლადიმირ პუტინის ილუზიური მიზნებისთვის სასიკვდილოდ გაიმეტა.

„ეს არის გზავნილი კიევიდან. მე ვარ ოლექსეი რეზნიკოვი, უკრაინის თავდაცვის მინისტრი. მივმართავ რუსეთის არმიის სამხედროებს, მეზღვაურებს, სერჟანტებს, მეთაურებს, ოფიცრებს, გენერლებსა და ადმირალებს... უპირველეს ყოვლისა, ჩემი მოწოდება მიმართულია ოფიცრებისა და სარდლობის მიმართ, რადგან თქვენ იღებთ გადაწყვეტილებებს“, - განაცხადა რეზნიკოვმა.

რეზნიკოვი ამბობს, რომ უკრაინელები თავს იცავენ, რუსები კი მარხავენ თავიანთ თანამებრძოლებს.

„ახლა თქვნი მედესანტეები იღუპებიან დნიპროს მარჯვენა სანაპიროზე. მათ იციან თავიანთი საქმე. მაგრამ კრემლში ვიღაცამ გადაწყვიტა მათი სასიკვდილოდ გამეტება... თქვენ მოგატყუეს და გიღალატეს. თქვენ გპირდებოდნენ იოლ გასეირნებას, მაგრამ ხაფანგში გაგიშვეს. თქვენ სისხლით იხდით საფასურს ვიღაცის ფანტაზიებისა და ცრუ მიზნებისთვის. ახლა თქვენ არ გისმენენ, რადგან თქვენი მოსმენა ნიშნავს შეცდომების აღიარებას, მოსკოვში კი არ უყვართ სიმართლე. მათთვის მარტივია ილაპარაკონ, რომ თქვენ გმირულად დაიღუპეთ, ნატო-სთან ბრძოლაში“, - თქვა რეზნიკოვმა.

მან აღნიშნა, რომ რუსი სამხედროები  უკრაინში არავის „ათავისუფლებენ“, არამედ ანადგურებენ ქალაქებს, სადაც ცოტა ხნის წინ მათ კეთლ მეზობლებად მიიჩნევდნენ.

„გეტყვით რა იქნება შემდეგ, ათასობით რუსი ახალგაზრდა დაიღუპება, უფრო მეტი დარჩება ხელებისა და ფეხების გარეშე. თქვენ დაგადანაშაულებენ და ისევ გიღალატებენ, როგორც არაერთხელ გიღალატეს“, - თქვა რეზნიკოვმა.

მან განაცხადა, რომ უკრაინელებს რუსეთის მიწები არ სჭირდებათ, თავისიც საკმარისი აქვთ.

„ჩვენ ვაძლევთ სიცოცხლის, უსაფრთხოების და სამართლიანობის გარანტიას ყველას, ვინც დაუყოვნებლივ უარს იტყვის ბრძოლაზე.  ჩვენ ტრიბუნალს გადავცემთ ყველას, ვინც იძლეოდა დანაშაულებრივ ბრძანებებს. თქვენ ჯერ კიდევ შეგიძლიათ გადაარჩინოთ რუსეთი ტრაგედიისგან, რუსეთი არმია კი დამცირებისგან, მაგრამ დრო გადის. არ დაკარგოთ ეს დრო“, - განაცხადა რეზნიკოვმა.