ევროკავშირის მიერ არაღიარებული ბელარუსის პრეზიდენტმა ალექსანდრ ლუკაშენკამ დაადასტურა, რომ ბელარუსი მონაწილეობას იღებს უკრაინაში „სპეციალურ სამხედრო ოპერაციაში“, თუმცა უარყოფს, რომ უკრაინაში რუსეთის დასახმარებად სამხედროებს გზავნის.

მისი თქმით, ბელარუსის მონაწილეობა გულისხმობს დაჭრილების მკურნალობას, დევნილების მიღებას და ბელარუსის ტერიტორიაზე კონფლიქტის გავრცელების დაუშვებლობას.

„ჩვენ არავის ვკლავთ, არსად ვაგზავნით ჩვენს სამხედროებს. არ ვარღვევთ ჩვენს ვალდებულებებს“,- განაცხადა ლუკაშენკამ.

ომის დაწყებისას, ბელარუსმა რუსეთის არმიას თავისი ტერიტორია დაუთმო. რამდენიმე დღის შემდეგ კი ლუკაშენკამ განაცხადა, რომ ბელარუსის ტერიტორიიდან რუსეთი უკრაინას ბომბავდა.

ამასთან, ლუკაშენკა ყალბს უწოდებს ინფორმაცის ბელარუსის მოსალოდნელი მობილიზაციის შესახებ.

მისი თქმით, მან ნამდვილად დაავალა სამხედრო კომოისარიატებს წვევამდელების შემოწმება, რომლებიც რეზერვსში ირიცხებოდნენ, თუმცა, როგორც თვითონ ამბობს მხოლოდ იმისთვის, რომ რუსეთის შეცდომები არ გაემეორებინათ.

 „როგორც კი რუსეთში დაიწყო მობილიზაცია, ყველამ დავინახეთ რა ხარვეზები იყო იქ. არ ჩავეძიებით საკითხის არსს - ეს რუსეთის ფედერაციის საქმეა, როგორ ჩაატაროს მობილიზაცია. მაგრამ როდესაც უწყებები გააგზავნეს, აღმოჩნდა რომ ვიღაც მოკვდა, ვიღაც გაიქცა, ვიღაც ავად იყო და ა. შ. ეს ჩვენთვის გაკვეთილია“, - თქვა ლუკაშენკამ.