უკრაინის შეიარაღებული ძალები დონბასში, ლიმანთან პოზიციებს იმყარებენ და დასახლებული პუნტქების გათავისუფლების შედეგად ქალაქს უახლოვდებიან.

ამის შესახებ ნათქვამია ამერიკის ომის შემსწავლელი ინსტიტუტის (ISW) ანგარიშში.

ანალიტიკოსების მონაცემებით, ლიმანის რაიონში გრძელდება სასტიკი ბრძოლები. უკრაინელი სამხედროები ახლოს არიან იმასთან, რომ იქ მოქმედ რუსულ ძალებს გადაუკეტონ მომარაგების ბოლო საშუალება და ოპერატიულ ალყაში მოაქციონ.

ISW-ის ექსპერტები წერენ, რომ 26-27 სექტემბერს უკრაინის შეიარაღებულმა ძალებმა ლიმანიდან ჩრდილო-დასავლეთითა და ჩრდილოეთით რამდენიმე დასახლება გაათავისუფლეს.

ამის გარდა, ამერიკის ინსტიტუტი, რუსულ წყაროებზე დაყრდნობით იტყობინება, რომ უკრაინის არტილერიამ ცეცხლის ქვეშ მოაქცია ქალაქში რუსული ჯარების მომარაგების უკანასკნელი გზა სვატოვოს, მაკეევკისა და ტერნიის გავლით. უკრაინის სადაზვერვო და დივერსიული ჯგუფები უკვე შეინიშნება ლიმანიდან სამხრეთ-აღმოსავლეთით მდებარე ქალაქებში - ტორსკოესა და იამპოლში.

ბახმუტის რაიონში (ერთადერთი უკრაინული ქალაქი, სადაც რუსული ჯარი ახორციელებს აქტიურ შეტევით მოქმედებებს), არსებულ ვითარებაზე ISW-ის ანგარიშში ნათქვამია, რომ 27 სექტემბერს იერიშები წარუმატებლად დასრულდა.

ინსტიტუტის ექსპერტები ციტირებენ New York Times-ის ჟურნალისტებს, რომლებიც უკრაინელ სამხედროებზე დაყრდნობით წერენ ბახმუტის ფრონტზე რუსული დაჯგუფება „ვაგნერის“ შესახებ. ჟურნალისტების მონაცემებით, „ვაგნერელები“ იყენებენ ომში გაგზავნილ პატიმრებს, საზარბაზნე ხორცად, რომლებიც ხშირად უკრაინელებს ტყვეებად ბარდებიან.

ამასთან, ოკუპანტები და კოლაბორანტები გარბიან იმ ქალაქებიდან, რომლებიც რუსებმა ჯერ კიდევ 2014 წელს დაიკავეს.