სოფელ ადიგენში მუსლიმანებსა და ქრისტიანებს შორის ფიზიკური დაპირისპირება მოხდა. დაპირისპირების მიზეზი რელიგიის საბჭოს გადაწყვეტილებაა, რომლითაც მუსლიმებს მიეცათ უფლება სოფელში ადგილობრივ მუნიციპალიტეტთან შეთანხმებით მოქმედი სასაფლაოსგან განცალკევებით ახალი მუსლიმური სასაფლაო გაეკეთებინათ.

რელიგიის საბჭოს განცალკევებით სასაფლაოს გაკეთების თხოვნით ადგილობრივმა მუსლიმებმა მას შემდეგ მიმართეს რაც შარშან სოფელში მცხოვრები რევაზ მიქელაძე გარდაიცვალა რომელიც ქრისტიანულ სასაფლაოზე არ დაკრძალეს და მეზობელ სოფელში დაასაფლავეს.

ადიგენის მუსლიმი მცხოვრები ლია იაკობიძე ამბობს, რომ აქამდე მუსლიმებსა და ქრისტიანებს კარგი ურთიერთობა ჰქონდათ.

“22 წელია ვცხოვრობ მე ადიგენში, ყოველთვის მქონდა მე ყველასთნ კარგი ურთიერთობა. ჭირი იყო თუ ლხინი იყო, ვედექი ყველას გვერდში, ანალოგიურად ჩემ მიმართ იყვნენ, მაგრამ რატომ, ასეთი რამე ვერ წარმომიდგენია. 2 მეტრი მიწა მკვდარს ეკუთვნება, ეს არის სამარცხვინო”, – განაცხადა ლია იაკობიძემ.

საბჭოს გადაწყვეტილება ცნობილი რამდენიმე დღის წინ გახდა და სოფელში ვითარება დაიძაბა რაც გუშინ ხელჩართული ჩხუბით დასრულდა, რომლის დროსაც ბიძაშვილები იაკობაძეები დაშავდნენ, მათ სხეულის მრავლობითი დაზიანებები მიიღეს.