ევროკავშირის უმაღლესი წარმომადგენელი საგარეო და უსაფრთხოების პოლიტიკის საკითხებში ჟოზეპ ბორელი ეხმიანება იზიუმში აღმოჩენილ მასობრივ სამარხთან დაკავშირებით აცხადებს, რომ რუსეთის ფედერაციის უმაღლესი ხელმძღვანელობა და ომის კანონების დარღვევაში მონაწილე პირები პასუხს აგებენ ჩადენილი დანაშაულებისთვის.

„ევროკავშირი შოკირებულია მასობრივი სამარხებით, 440-ზე მეტი ცხედრით, რომლებიც უკრაინის სამართალდამცავმა ორგანოებმა იზიუმში აღმოაჩინეს... ჩვენ უმკაცრესად ვგმობთ ამ სისასტიკეს. რუსეთის აგრესიული ომი უკრაინის წინააღმდეგ სისხლისა და ნგრევის კვალს ტოვებს მთელ ქვეყანაში“, - ნათქვამია განცხადებაში.

ბორელი აღნიშნავს, რომ უკვე ათასობით მშვიდობიანი მოქალაქე მოკლეს, ბევრი აწამეს, გაიტაცეს, შეურაცხყოფა მიაყენეს, სექსუალურად იძალადეს, იძულებით გაიყვანეს.

„რუსეთის ძალების ეს არაადამიანური ქმედებები სრულიად უგულებელყოფს საერთაშორისო ჰუმანიტარულ სამართალს და ჟენევის კონვენციებს და ეს ქმედებები დაუყოვნებლივ უნდა შეწყდეს. რუსეთი, მისი პოლიტიკური ხელმძღვანელობა და ყველა, ვინც მონაწილეობს უკრაინაში საერთაშორისო სამართლისა და საერთაშორისო ჰუმანიტარული სამართლის დარღვევაში, პასუხს აგებს. ევროკავშირი მხარს უჭერს ამისკენ მიმართულ ყველა ძალისხმევას“, - აღნიშნა ბორელიმ.