აფეთქებების სერიის შესახებ იუწყებიან ანექსირებულ ყირიმში, სოფელ ნოვოფედოროვკაში (საკი) სამხედრო აეროდრომზე.

Krym.Realii-ს ცნობით, სავარაუდოდ, იწვის საბრძოლო მასალების საწყობი და აეროდრომის ასაფრენი ბილიკი.

"პირველი აფეთქება დაახლოებით 15:20 საათზე გაისმა, სულ 10 აფეთქების ხმა გაისმა", - იუწყება მედია თვითმხილველებზე დაყრდნობით.

რუსეთის თავდაცვის სამინისტრომ დაადასტურა აფეთქებები აეროდრომზე ნოვოფედოროვკაში.

"დაახლოებით 15:20 საათზე, საკის აეროდრომის ტერიტორიაზე, ნოვოფედოროვკას დასახლებასთან, საცავში საავიაციო საბრძოლო მასალა აფეთქდა", - აცხადებენ სამინისტროში.

"ადგილიდან მიღებული ინფორმაციით, აეროდრომზე საბრძოლო მასალის შეფუთულ სათავსოზე ცეცხლის ზემოქმედება არ მომხდარა."- ირწმუნება რუსეთის თავდაცვის უწყება.

თავდაცვის სამინისტროს ინფორმაციით, აფეთქებებს მსხვერპლი არ მოჰყოლია, აეროდრომზე განლაგებული თვითმფრინავები არ დაზიანებულა.

ადგილზე სასწრაფო დახმარების ეკიპაჟები და სამედიცინო ავიაცია მუშაობენ.

საკის აეროდრომი ნოვოფედოროვკას მახლობლად, ყირიმში რუსული ავიაციის ერთ-ერთი მთავარი აეროდრომია.

იქ განლაგებულია რუსეთის საჰაერო კოსმოსური ძალების 43-ე გამანადგურებელი საავიაციო პოლკი, რომელიც ძირითადად შედგება Su-30SM, Su-33 თვითმფრინავებისა და Su-24M ბომბდამშენებისგან.